廠迷嬲到震 大鬧雲加係「弱智恐龍」
歐聯16強首回合，阿仙奴周三對拜仁慕尼黑場波以1:5大敗，勁多香港廠迷好失敗，除左自嘲「劇本已經寫好」，教練雲加當然成為眾矢之的。而外國嘅球迷亦都唔例外，阿記死忠Troopz對住鏡頭毫不吝嗇啲粗口，炮轟雲加係「智障恐龍」，係時候絕種。
近日「反雲」傾向明顯嘅 ArsenalFanTV 喺安聯球場外訪問外十幾個球迷，而Troopz就成為最激動個個，相信都係因為「愛之深、責之深」。ArsenalFanTV 當然唔會放過惹火言論，足本播晒Troopz點樣喪鬧自己愛隊同埋雲加。Troopz一嚟就鬧雲加係人渣，話兩年對兩次拜仁，都係輸1:5，加埋輸2:10。
雲加個日都想喊（AP圖片）
Troopz又認為根本毫無反勝機會，之前連李斯特城都贏唔到真係笑話，今次比拜仁炒到無面，雲加根本無料到，係時候要走人。當主持問到球員有無責任嘅時候，Troopz認為當然有責任，但個陣容邊個排，條防線打到學界比賽咁，無眼睇。
勁嬲！！！
講到呢到，相信球迷都感受到Troopz內心其實係淌血，佢話買飛嚟睇比賽其實好麻煩，點知仲要睇到咁嘅表現。佢將矛頭再次指向雲加，話佢根本對阿仙奴無貢獻，無熱情、無章法，已經玩野，每一年劇本已經寫定。最後再補多一刀，話雲加係弱智恐龍，係時候要絕種。
中文譯片請睇（有粗口，不過咁嬲都正常）：https://www.facebook.com/footballdailyhk/videos/356786308055341/
