有圖有真相﹗瑟頓聯門將嘆「批」睇足總盃
老一輩嘅香港足球迷，或者會記得係旺角場重建之前踢既港澳埠際賽，客隊後備席有球員食住雞脾睇波﹗似曾相識嘅畫面，喺凌晨舉行嘅英格蘭足總盃16強瑟頓聯主場鬥阿仙奴出現﹗瑟頓聯後備門將韋恩梳爾（Wayne SHAW），被當地電視台影到佢喺場邊「食批」﹗
最期待的畫面出現了﹗韋恩梳爾食美味餡餅支持瑟頓聯。（網上圖片）
體重280磅，因為外型同漫畫人物相似，而被香港球迷稱為「布歐門將」嘅韋恩梳爾，雖然冇份落場，不過呢位45歲嘅助教團成員兼庶務部大總管（可以稱為打雜），絕對貫徹「我要做好呢份工」嘅精神，賽前拎住部吸塵機，一個人將球場彷真草地吸到靚靚，比賽期間換角色做親善大使，行到小賣部俾球迷捉住影相，就以「好客精神」回應，樂此不疲，順便「做個大批」，買個餡餅俾自己，呢個批不但好食，仲喺比賽尾段，俾電視台影到佢「咬住大批」嘅畫面，直播出街。
「布歐門將」所到之處，總會吸引球迷爭相與他合照。（網上圖片）
雖然瑟頓聯最終吞兩蛋出局，晉級過程當中，作為後備門將嘅韋恩梳爾上陣時間亦一分鐘都冇，但無可否認，非聯賽嘅瑟頓聯能夠走到16強，已經足夠成為今屆足總盃，其中一支令人回味嘅神奇球隊。
比賽場地吸塵工作，都由「布歐門將」負責。（網上圖片）
