激將法鼓勵落水狗 美式足球隊贏波 球迷可獲賜酒？
賜酒，到底有無鼓勵作用？
用賜酒予球迷來激勵球隊，是否可行招數？ 克里夫蘭布朗Twitter圖片
咩叫跌落谷底？問下呢隊美式足球隊克里夫蘭布朗就一清二楚。自從2016年常規賽之後，呢支球隊從來未有贏過一場波，一場都無呀陰公。上季戰績，係驚人的0勝16負，再上季好一點點，1勝15負，認真叻到無朋友。對上一場比賽贏波，已經數到2016年聖誕之前，數數手指都就快兩年時間啦。
一要努力。 克里夫蘭布朗Twitter圖片
二要努力。 克里夫蘭布朗Twitter圖片
三四五六都係要努力，衰到貼地又如何，再來一次吧，年輕人。 克里夫蘭布朗Twitter圖片
即使跌落谷底，都要掙扎爬返起身，克里夫蘭布朗為咗表示贏波決心，幕後團隊想出一招「向球迷賜酒」的玩意，只要新球季克里夫蘭布朗贏到一場波，只要贏一場，球隊就會向球迷賜酒，成箱啤酒任你飲，一於來一次啤酒放題。雖然有球迷質疑，啤酒唔知要放幾耐先可以開封，不過球隊就話每一個月都會換一次啤酒，保證新鮮好飲。
新球季，克里夫蘭布朗首場在9月9日對匹茲堡鋼鐵人，到底克里夫蘭布朗可否成功向球迷賜酒呢？大家密切留意呢單新聞，到時候一見到有update，本網會再向大家送上啤酒放題慶祝的實況，多謝大家收睇。
