搞出個山墳來
屯門居民近日發現，友愛邨與翠寧花園之間一小段皇珠路狹窄空地，突然出現幾座用石塊砌成，圓拱狀類似中式山墳的構建物。追查之下，發現原來係運輸署回應屯門東南分區委員會、區議員及市民反映，指上述路段經常有非法聚賭，所採取的應對措施。
防止有人在天橋底露宿，相關部門亦曾以滿鋪小型金字塔狀石屎塊對應，今次竟然出動類似山墳物體，都算匪夷所思。至於署方解話，更係創意爆棚，爆到上火星。由圖片所見分明係山墳模樣，做官嘅第二把口可以解釋成：係以岩石鋪砌小丘園境，簡直神乎奇技。
防眾聚賭，是個老問題，總該有唔少經驗可以借鏡。如果因為地形及預算問題，要做另些建設，也不可能搞出個山墳來。本來做份政府工，冇人要求一定要帶審美眼光返工，但公眾地方搞公共建設，切忌大吉利是，已經同審美無關；而係普通常識。香港缺地，拿來做社區園圃，甚至以短期租約出租，總會有個適用方案罷。
個人以為不應當這件是小事，笑了作算。當中最基本存在兩個疑問。就程序言，為官之道，凡屬跨部門項目，冇部門主管會帶頭揸主意或拍板，簡單如飲水機應該放那個位置，都會出memo，美其名徵集所有持份者意見，實情係如有問題，就係集體負責。至於疑問二，設計方案冇可能只得一個，亦即係除了狀似山墳設計外，總該還有其他的各式候選設計。
問題來了。幾個候選方案，按正規程序，走勻相關部門，相信最少有幾十人曾經審視過相關設計，討論文件甚至財務預算，竟然最終會同意接受這樣一個山墳設計？究竟當官的態度係因循苟且，依樣葫蘆？抑或係私下暗笑，睇你點死？我們的特區政府究竟出了甚麼大問題？
楊振耀
** 博客文章文責自負，不代表本公司立場 **
