走塑與偽環保
據報道指，原來三大快餐店一個月外賣合計派出約近五百萬份即棄餐具，都咪話唔恐怖！自去年11月中，政府聯同三大試行外賣「走塑」，為期兩個月的計劃即將屆滿，成效未知。那邊廂美國麥當當實行全面走飲管後，有食客為支飲管與店員爆肢體衝突被捕。
設計圖片
冰封三尺非一日之寒，搞成咁，應探討一下近排大家嗤之以鼻的偽環保。筆者和大家一樣，當然支持環保走塑，只是有好多嘢唔用飲管真的很難飲，例如開到成行成市的珍珠奶茶，難道要用匙羹在街上邊行邊掏？奶昔呢，有人建議用匙羹喝，但是否有點像在吃融掉了的雪糕？而，那匙羹，相信是即棄膠匙吧，咪一樣唔環保？
當然有人可以完全不用飲管，朋友見飲管一般外露存放，質疑有衞生問題，從小已直接用杯飲。
有地盤寫字樓同事自行製作環保飲管套裝，非常好。
講真，大家主要很不滿一刀切偽環保不實際，為何不改物料例如用紙飲管？相信因爲貴囉！還有大量膠蓋膠杯膠匙羹等等，全部都有泛濫之嫌，但不可能完全不用。
就算使用可降解塑膠都有問題，因為發現降解了的膠都是膠，只是細粒到好似微膠珠咁，被魚吃下消化不了，最後都是人類食魚的時候自己食返啲膠。
外國於是研發了可以吃掉的即棄餐具，例如印度的穀匙叉、韓國的米飲管，大量採用有助降低成本，三大也應考慮引入，而特區政府更應主動協助研發自家製可吃的餐具，然後全面推行。
不過，無論是甚麼物料，都應盡量少用、唔好濫用、有需要先用，咁先係正確態度，人類若不改陋習，到頭來一樣要承擔惡果。
鄧銘心
** 博客文章文責自負，不代表本公司立場 **
