【飲大咗】四單香港名人酒後出事事件薄 高官暗星國際巨星都有份
學生力啤話齋，酒醉八分醒。
- AP圖片
最近許志安同黃心穎飲醉酒喺的士纏綿十六分鐘，兩個表面上大纜都扯唔埋嘅人竟然會雙雙出軌，不過好多香港明星或者政界名人都曾經試過飲醉酒出事，而家稍為整合下近幾年嘅類似事件等大家回憶下。
1.《陳浩民、馬德鐘輪流非禮陳嘉桓》
- 網上圖片
時值2011年11月19日，當時19歲嘅陳嘉桓喺橫店拍攝電影《笑功震武林》，當晚收工後同洪天明、陳浩民及馬德鐘出席飯局。當晚洪天明不勝酒力，喺串燒店瞓着左，其後飲大兩杯嘅陳浩民竟然向比自己細21年嘅陳嘉桓出手，又啜又摷，摸勻全身。其後一直旁觀嘅馬德鐘更玩埋一份，喺陳嘉桓耳邊吹氣兼強吻。雖然陳嘉桓本身識功夫，一來本身飲左酒，二來又要面對兩個大男人兼前G4員，當然係無力反抗。
事後陳浩民先喺微博上回應話自己太好客累事，而馬德鐘更將否認所有非常指控，指自己當只係安慰陳嘉桓同有阻止陳浩民。之後陳嘉桓喺冼國林陪同之到觀塘警署報警，而陳浩民見搞大件事就帶大肚嘅老婆召開記者會道歉，後來更登報道歉啓事兼承諾捐錢先得到冼國林原諒。而馬德鐘就一早私下同冼國林解釋左，然後再出公開信要出律師信告踢爆事件嘅東方新地兼捐錢到東華三院，順利甩身。奇就奇在成件事陳嘉桓係受害人，但陳浩民同馬德鐘都要得到冼國林原諒，而唔係視乎受害人本身意願。
2.《朱培慶裙下之臣事件》
- 網上圖片
喺2007年，時任廣播處處長朱培慶畀記者發現喺銅鑼灣同一個女人拖手，朱培慶當時仲要匿喺同行女子後面，其後朱培慶透過港台發言人指女伴係佢朋友。但係，其實當嗰個女伴係四川籍夜總會小姐CoCo，當晚朱培慶合共埋單一萬蚊先可以帶到CoCo出街。其後朱培慶申請提早退休，領取900萬嘅退休金，而喺退休前嘅休假期間，佢都可以繼續收每月16萬嘅月薪。朱培慶從來冇承認嫖妓之事，只係婉轉地講：「The only comment I would make is that alcohol is not very conducive to good behaviour. So my advice has been drink less.（我只會講酒精並不導人向善，我建議飲少啲。）」。
朱培慶更因此事而影響到當年嘅「撐港台運動」，當年特首委任「顧問委員會」監察香港電台，社會憂慮新聞及言論自由受阻，所以發起撐港台運動。但朱培慶事件曝光，直接打擊港台形象，甚至有網民製作短嘲笑朱培慶及香港電台。
3.《阿Bob醉酒鬧事猛啜梁烈唯》
- 網上圖片
喺2015年嘅時候，阿Bob林盛斌出席錢國偉婚禮，當時阿Bob飲醉衝上台搞事，同樣飲醉嘅陳小春見到之後就發脾氣爆粗掟咪，追打阿Bob，之後先畀其他人隔開，離開嘅時候仲強吻梁烈唯三次。之後阿Bob公開道歉。
4.《成龍醉酒大鬧李宗盛紅館演唱會》
2006年台灣殿堂級歌手到紅館開演唱會，飲醉酒嘅成龍竟然衝上台搞事，逼李宗盛同佢合唱，前後擾攘20分鐘。一眾歌迷鬧爆成龍，但成龍懶理兼爆粗，認真失禮。之後成龍接受有線娛樂新聞台訪問嘅時候道歉，而李宗盛就好大方表示見到成龍有嚟都好開心。
