咩係電影「導演剪輯版」？ 咩係「最終剪接權」？ 連劉華都想要？
點解唔少戲都會發行「導演加長版」或者「導演剪演剪輯」嘅DVD？其實就唔係呃錢咁簡單。
網上圖片
我地成日都會見到好多電影喺發行DVD、Blu-ray嘅時候，都會有一個叫「導演剪輯版」或者叫「導演加長版」（Director's cut）。好多人覺得導演加長版先係最好嘅版本（或者有人覺得係電影公司想賺多啲錢先整多個版本），咁到底咩係「導演剪輯版」？
網上圖片
一般嚟講，「導演剪輯版」係導演根據自己意見剪接嘅作品，唔會受到電影公司干預。不過，通常「導演剪輯版」嘅電影係唔會公開放映，好多時喺市面上見到「導演加長版」係特別例子。
網上圖片
喺荷李活嚟講，如果導演係屬於美國導演工會（Directors Guild of America，簡稱DGA），咁樣導演就會肯定有剪接權，亦即係「導演剪輯版」。DGA喺佢地工會手冊《Creative Rights Handbook 2014-2017》列明導演喺後期剪接嘅權利，講明一定要保證導演嘅剪接權，同完剪接師開會之後，導演一定要主理第一個剪接版本，導演可以全權指揮剪接師。
網上圖片
同時間，DGA都規定左「導演剪輯版」嘅放映要求：(一)只有製片人同擁有「最後剪接權」(Final Cut)嘅人先可以睇「導演加長版」；(二)導演有權要求舉行一場一百人以下嘅私人放映（唔包員工同家屬）；(三)電影嘅放映一定要符合戲院放映格式；(四)如果電影有特效嘅話，導演都要製作臨時特效，電影公司都要畀足夠嘅時間去做。
網上圖片
先前有提過嘅「最終剪接權」(Final Cut)，咁一般嚟講電影公司先會有Final Cut嘅權利。即係荷李活嘅導演其實係冇咩話語權，除左某啲大導演先至有得傾，例如馬田史高西斯、史提芬史匹堡、占士金馬倫。咁始終一部荷李活大片洗成幾十億投資，電影公司唔會咁易讓步畀電影有創作自由。
網上圖片
荷李活工業制度完善，導演嘅創作自由都受到保障，不過香港就未必會咁有保障。好多香港演員都好緊張電影嘅最終品質，例如據聞天王劉德華會喺佢嘅電影合約上面加埋要有最終剪接權，令唔少導演都好頭痕。有良好嘅工會制度，一嚟可以保障到電影從業員嘅利益，二嚟又可以多個渠道畀勞資雙方溝通，對大家都好。
