《小丑回魂2》最新預告 嚇鬼阿婆勁詭異 兩大巨星聯手對抗小丑
呢排荷李活戲似乎對阿婆有啲恐懼，之前Marvel隊長肉搏阿婆，而家就輪到《小丑回魂2》同阿婆困獸鬥。
由標沙士格（Bill Skarsgard）主演的《小丑回魂》續集再次登上大銀幕，華納電影喺5月9號嘅夜晚就公布最新預告。有觀眾仲留言話睇完預告差啲瞓唔到，相信影迷都會滿意今次嘅續集。
網上圖片
喺今次嘅《小丑回魂2》前導預告入面，除左繼續有標沙士格飾演小丑之外呢，當年「失敗者俱樂部」嘅小成員都長大成人，因為故事背景距離上集己經過左27年。而金球奬影后謝茜嘉翠絲頓（Jessica Chastain）飾演嘅 Beverly Marsh 再次返去德里市。
網上圖片
喺預告入面見到，謝茜嘉返到去舊屋，而新住客就係一位老婆婆。兩個人傾偈嘅時候，謝茜嘉發現阿婆原來同小丑係有關係，因為牆上掛住左寫住「偉大的潘尼懷斯」（即係小丑個名）嘅合照。之後阿婆就變成一隻怪物襲擊謝茜嘉，仲逼到佢企埋牆角。
網上圖片
其後鏡頭一轉，七個「失敗者俱樂部」嘅成大集合，占士麥艾禾（James McAvoy）仲鼓勵謝茜嘉一齊對抗小丑！今次小丑似乎比起第一集似乎更加恐怖凶殘，例如小丑會用紅氣球飄吊喺半空，又會自挖雙目，最後仲對住鏡頭奸笑，令人不寒而慄。
另外，華納為左宣傳《小丑回魂2》，早喺五月七日喺紐約時代廣場度落廣告，標語就喺「見證IT終結」。當然宣傳片仲有小丑嘅白手套同埋紅氣球，喺小丑鬆開第一個氣球嘅時候，隨即就有成千上萬個紅氣球湧向大屏幕，密集都令人毛管戙！
網上圖片
《小丑回魂2》將於九月喺香港上畫。
