黑超Chilam母親節陪媽咪逛商場 母子有講有笑超溫馨
好乖仔~
周日（12日）就係母親節！娛圈滿分乖仔Chilam（張智霖）已身體力行、提早同餅印媽咪曹珍妮慶祝啦！日前下午，黑超Chilam陪金毛靚媽行中環ifc，凍齡兩母子有講有笑，全無代溝。最後，當張媽媽發現有記者時即怕羞耷頭，Chilam馬上化身保鏢，快閃為媽咪擋鏡，溫馨護母又好Man呀！
Chilam做人肉擋箭牌man爆護母。（網上圖片）
兩母子沿途有講有笑好溫馨。（網上圖片）
黑超張智霖唔介意被途人認出，一直陪伴母親等取手機。（網上圖片）
天生童顏張智霖，現年四十有七，但依然皮光肉滑，加上招牌酒窩，一笑真係迷死人。Chilam顏值屬頂級，完全係遺傳自其母親的靚樣。有指Chilam外公係中德混血兒，張媽媽亦是混血一族，後生時眼大鼻高鬼咁索，係1962年香港工展小姐冠軍。前年7月，Chilam表姊上山詩鈉po幅張媽媽70大壽照片，唔少網民大讚金毛張媽媽驚艷，仲話凍齡男神Chilam遺傳了「凍齡防腐」基因。
前年，Chilam和太太袁詠儀約埋各自母親，搵家人一同慶祝母親節。（網上圖片）
Chilam大晒兩母子慶祝母親節嘅合照。（網上圖片）
後生時嘅曹珍妮眼大大輪廓好深，屬美人一族。 （網上圖片）
日前下午2時許，努力搣甩似「哆啦A夢」污名嘅Chilam，減咗磅回復返少少model身形現身ifc，同行還有其餅印母親曹珍妮。咪睇張媽媽就快72歲，心境衣着都好young，紫色反領top、白色波鞋配名牌手袋，化了個靚妝同星味兒子行孖咇。凍齡母子去咗連鎖店維修部，見Chilam拎單畀店員，未幾店員將一部似係維修好手機交畀美魔男check，阿仔睇完再交畀母親，原來專登陪張媽媽來攞機。其後，二人再行逛一輪睇新款手機，逗留15分鐘才離開。兩母子沿途有講有笑好溫馨，及至發現有記者，Chilam例牌微笑揮手say hi，但張母就被嚇親，怕羞耷頭縮後。乖仔見狀即企喺媽咪前面做人肉擋箭牌，man爆護母行動，張媽媽甜入呀！
