女乘客等巴士即將埋站才撳鐘 拍片怒斥車長「飛站」：害到我好慘
為咗你落車可能會害咗其他乘客。
日前一名女乘客趁巴士臨近埋站按鐘後，車長仍「飛站」，女乘客多番表示「有落」，車長初時不予理會，後來才指對方太遲按鐘，「要急煞畀你落呀？」、「你第一日搭巴士？」女乘客不滿與車長理論並拍片，斥車長「害到我好慘」。
車長事後上載涉事車Cam片段上網，但網民意見兩極，有人批評車長「冇諗過要埋站」；亦有人指「巴士已經行順咗，突然急煞好危險」。
網上圖片
有疑為涉事車長的網民在facebook群組「巴士的事討論區」上載7段片段，可見事發於5月30日上午11時許，當車長駕駛巴士至近東堤灣畔時，一名乘客在該車站前約30米按鐘示意落車，但車長沒有埋站，並繼續駛往下一站赤鱲角南站。
網上圖片
途中該女乘客曾多次表示「司機有落」，但車長初時都沒有理會，後來才「寸嘴」問對方「要唔要畀你睇下你幾時撳鐘」、「一到站就要急煞畀你落呀？」「你第一日搭巴士呀？」巴士抵達赤鱲角南站後，女乘客取出手機拍攝車長名牌及車長容貌，車長則向女乘客展示車Cam拍攝的事發經過。雙方各執一詞，女乘客期間又指責司機「害到我哋好慘呀？」、「你叫我哋點返工」。
車長事後留言，為「飛站」辯解：「咁大部巴士前面打晒燈要埋站，後面有車嚟緊，你搭電梯都唔係一撳就停啦，而且急煞有人受傷入邊個數」。
網上圖片
帖文在網上掀起熱議，有網民認為車長沒有埋站是正確，「如果當時立即切入埋站畀妳落，係好危險的駕駛動作。。隨時突然急速埋站，一係炒上壆！嚴重者可以成架巴士失一失重心反車都得！所以如要落車，真的要請早按鐘」、「 最後一秒先按，梗未埋站啦！」另有人則指責車長「本身你都冇諗住埋站」、「根本冇收油嘅意欲」。
