【小知識】一唔留神就以為真 三例違反物理定律嘅電影場景
電影人都好難做嘅，拍戲樣樣都啱物理定律就好易變教育電視。
- 網上圖片
如果電影全部都要跟返物理定律嚟拍的話，視覺效果一定冇咁好，例如經常科幻片到見到好多唔同顏色嘅激光、又或者動作片成日見到主角做到超乎常理嘅動作、戰爭片會見到轟炸機投放炸彈係垂直掟落去。但其實全部都違反晒物理定律，今次就揾左三個例子畀大家參考下，下次睇電影不妨留意下有無類似不合物理定律嘅場面。
1.肉眼見唔到激光束同紅外線
喺六十年嘅經典電影《鐵金剛大戰金手指》，有一幕占士邦畀人綁喺張枱度，上面嘅激光槍對住張枱射激光，當激光打中嘅地方就會即刻被切開，而占士邦就當然要諗計鬆綁走人。
- 網上圖片
但其實喺現實世界入面，我地係唔會見到激光槍射出嘅激光。無數粒子組成左光，我地肉眼之所以會睇到嘢，係因為光線照到物件，反射之後，部份光線反射到我地嘅眼度。而激光最特別嘅地方就係光束集中，兼且向同一個方向走，我地一定要係對正光束嘅方向先會見到，其他角度都係係唔會睇到光束。又或者激光畀物件阻擋，例如牆壁可以改變光子走向，再反射入眼，所以大家先會睇到牆壁或身軀上嘅光點。
咁點解我地又會見到夜場嘅激光呢？係因為通常現場都好大煙，激光接觸到空氣嘅微粒之後散射，改變左走向，所以先至唔對正光線都見到光束。
2. 助跑要快過保特先跳到過對面樓
舊年上畫嘅《高凶浩劫》，主角狄維莊遜負責香港高科技大樓The Pearl嘅保安評估工，但大樓起火，主角屋企人生命危在旦夕，於是佢就由天秤跳過對面樓，跳入大樓救人，呢一幕仲用嚟做電影海報。但喺現實咁做的話，分分鐘仲快死過要身陷險境嘅屋企人。
- 網上圖片
如果要由天秤最尾個位起跳，兼且要喺海報嘅高空位置穿入爛窗，以拋物線軌迹方程式去計數，狄維莊遜助跑嘅速度需要去到每秒13米，仲快過保特嘅世界紀綠。保特最快嘅跑速係一秒12.4米。
3.轟炸機投擲嘅炸彈冇可能會垂直跌落
戰爭片《珍珠港》，有一幕係日本轟炸機空襲美國軍艦，轟炸機向下方投擲炸彈，炸彈垂直落去，美國戰艦炸毁。但係現實中都係冇可能做到，因為咁樣係違反左牛頓第一運動定律嘅「慣性定律」。
- 網上圖片
因為日本轟炸機因為係高速飛緊，當佢投放炸彈嘅時候，炸彈嘅慣性令佢保持繼續向前嘅運動狀態，所以係冇可能垂直墜落正中目標。如果飛緊嘅轟炸機要將炸彈命中美國軍艦，炸彈嘅運動軌迹要符合返拋物線運動原理。假設轟炸機以時速360公里喺高空3000米上空飛緊，用拋物線軌迹公式計算，轟炸機一定要喺軍艦前2.5公里投擲炸彈，炸彈會以拋物線接近目標。但係，現實入面仲要計埋風阻同風向等數據。
