《搖滾太空人》重現「樂壇大姑媽」音樂歷程 細數艾頓莊巴閉事跡
睇完你就知佢有幾巴閉！
網上圖片
有「樂壇大姑媽」之稱嘅艾頓莊（Elton John）嘅傳記電影《搖滾太空人》最近就正式上畫，電影講述佢由英國鄉下怕醜仔，漸漸蛻變作世界巨星嘅成名之路。《搖滾太空人》就由《皇家特工》嘅泰朗伊加頓扮演艾頓莊，聽講仲要係大姑媽點名要佢做主角。喺入場睇《搖滾太空人》之前，不如重温艾頓莊以前威水事跡，睇嗰陣都開嗰陣都會開心啲。
網上圖片
今年七十二歲嘅艾頓莊喺六十年代出道，嗰陣英國樂壇仲係以結他為主，佢以鋼琴自彈自唱嘅表演相當之劃時代，改變左全世界流行歌手嘅表方法。艾頓莊至今嘅唱片銷量就累積左超過三億五千萬張，喺英國唱片史上屈居「披頭四」排第二。
網上圖片
早喺大姑媽四歲嗰陣，大家都發現左佢係音樂天才，喺十一歲嗰陣因為出色嘅鋼琴技巧而拎到倫敦皇家音樂學院獎學金。艾頓莊由《Honky Chateau》到《Rock Of The Westies》，連續七集大碟都贏左Billboard第一位，1975年嘅《Captain Fantastic And The Brown Dirt Cowboy》仲喺第一個禮拜發行嘅時候就已經係銷量第一，係Billboard歷史上第一個人可以做到。而且佢喺七十到千禧年代，更加連續三十年都有單曲上榜。當艾頓莊嘅作品唔止叫座，佢曾經贏得多個格林美大奬，兩度奪得最佳流行歌手，喺二千年嘅時拎埋傳奇貢獻獎。
艾頓莊周身刀張張利，當然唔會淨係出碟啦，佢為多部電影做配樂作曲一樣咁經典。佢曾經典為迪士尼動畫《獅子王》創作三首歌，包括：《Can You Feel the Love Tonight》、《Circle of Life》、《Hakuna Matata》，當年仲要三首同時入圍奧斯卡最佳原創電影作曲！最後佢以《Can You Feel the Love Tonight》贏左大奬。除左《獅子王》之外，佢仲有為唔同嘅電影作曲，包括：歌舞片《紅磨坊》嘅《Your Song》、《四個婚禮一個葬禮》嘅《Crocodile Rock》。
艾頓莊其中一首金曲《Candle in the Wind》原本係講劃瑪麗蓮夢露嘅荷李活悲劇演藝生涯，後來戴安娜王妃意外過生，佢將呢首改寫成《Candle in the Wind 1997》嚟紀念朋友，當年仲喺王妃嘅喪禮演唱悼念。之後呢首歌為左紀念王妃而再次發行，全球銷量超過三千三百萬張，成為樂壇史上最暢銷嘅原唱單曲。
網上圖片
