【你知我知】譚詠麟喺1989年嘅三首撐民運之作
你知我知，單眼佬都知。係得譚伯唔知。
網上圖片
喺1989年嘅夏天，譚伯推出大碟《忘情都市》，裏面有三首歌係關於中國八九民運。當年咁反動嘅譚伯同而家嘅所作所為判若兩人，所以今日一定要介紹下譚伯良心之作，務求十四億中國歌迷都要聽到呢幾首歌。
1.《你知我知》
呢首《你知我知》係大碟《忘情都市》嘅主打歌，歌曲係改編瑞典搖滾組合Roxette 嘅《The Look》。《你知我知》歌詞表面上係講男女情慾關係，但再諗深一層其實係有另一番解讀。喺1989年嘅五月，北京實施戒嚴，封鎖消息，當年中國記者就喺機場哀求香港人將新聞片段帶返香港，一句「若是問我可否將所想的封鎖 就像問我絲巾可否包一堆火」就知咩事。
網上圖片
點解今日譚伯會咁愛國愛港？「其情形NA NA NA NA NA 大家都知(不講也知)」
2.《我心如雷》
《我心如雷》嘅歌詞表面上係睇起嚟係畀情人派帽搞到心情無比痛苦，「識穿你的謊話／等於摧毀心中信念」「我最愛的都講著大話／我要再信誰」。當然政治歌必然係會兩重意思，留意返歌詞從冇講明「我」同「你」係咩關係。
網上圖片
再強調多次《忘情都市》係喺1989年推出，當時喺中英談判之後好多香港人都對祖國有美好想像，但係六四事件發生左之後，好多香港人嘅美好幻想都一掃而空（包括主唱嘅譚伯）。
「在舊日裡 分擔喜與淚 但現在我要再想 過去你是誰」呢度都睇到當時譚伯對中國嘅心態，本身對九七年滿懷希望，但係今日就要諗真啲以前係唔係想呃香港人信你呢？「我今晚心如雷 情痴已劈得粉碎」，歌詞強調係「今晚」而唔係「今日」。睇嚟譚伯喺嗰一晚好唔開心，不過唔緊要，相信嚟到2019年嘅六月佢已經唔記得晒以前啲傷心事。
「不可看穿的心 不可解釋的恐懼」相信都好明顯睇到譚伯當時到底係恐懼啲咩。
3.《爭氣》
呢首《爭氣》雖然旋律同編曲都比較老土，再加埋譚伯嘅唱腔，某程度上嚟講係有些少難聽。不過《爭氣》嘅歌詞就相當直白，唔會好似《你知我知》《我心如雷》咁樣加一層男女關係做表喻，大家睇返歌詞可以感受到。
「兩眼看到的 我怎麼可說看不到 兩耳聽到的 我怎麼可說沒聽到」
「過去我不知 我身邊是誰弄把戲
此刻於此地 方知生共死 也要憑雙手 爭氣」
網上圖片
