觀眾質疑真人版《花木蘭》唔符合史實？
其實又唔洗咁考究嘅，橫掂套戲都係講英文，唔太離譜都冇咩所謂。
網上圖片
迪士尼真人電影《花木蘭》最近發布最新預告，今次由紐西蘭女導演Niki Caro執導，劉亦菲主演。但預告公布之後，好多觀眾都有唔少疑問，究竟呢部電影符唔符合歷史？
1.古怪化妝
網上圖片
喺預告入面見到鄭佩佩大讚花木蘭有齊晒做個好老婆嘅美德，但觀眾都畀木蘭嘅怪妝搞到分晒心。其實呢一幕忠實呈現左《木蘭辭》「對鏡貼花黃」，花木蘭生於南北朝，當時嘅女性就流行「曉霞妝」、「額黃妝」同「壽陽落梅妝」。喺預告中見到嘅妝就係額黃妝。因為南北朝時期嘅佛教文化流行，有人喺佛像身上拎到靈感，所以就將額頭旁成黃色，所以「額黃妝」又叫做佛妝。
另外「壽陽落梅妝」都幾出名，仲可以連埋「額黃妝」一齊化。傳說壽陽公主瞓喺梅花樹下面，一朵凋謝嘅梅花就飄落喺公主嘅額頭上面，因為咁而留低下印記。《木蘭辭》入面嘅「對鏡貼花黃」，入面嘅「花黃」就係指呢個梅花印記。
2.「圓形土樓」
網上圖片
喺預告入面，我地仲可以見到木蘭嘅屋企係一楝圓形土樓，通常呢啲土樓會喺福建度見到，亦都係客家人嘅習俗。其實土樓係中國北方流傳落嚟嘅習慣，叫左「塢堡」。但係，中國北部嘅「塢堡」多數都係方形，而唔係圓形，所以電影都應該係要以方形「塢堡」。而且花木蘭係北魏人，中國北方嘅地貌長期乾旱，同土地肥沃天氣宜人福建完全唔同。
3.南北朝未流行坐凳
網上圖片
喺預告入面，每個角色都坐左喺張凳度，其實古代中國未有咁流行坐凳，多數係席地而坐，到漢代嘅時代就係坐「榻」。之後到唐代先開始流行，到宋朝嘅時候就發展到人人有凳坐。換句話，喺南北朝嘅時候，「凳」或者「椅」（有椅背就叫「椅」、冇椅背就叫「凳」）有機會喺中國出現，但絕對係未流行到個個有凳坐嘅階段。
