【壯志凌雲】網民嫌棄前作女主角太老 其實背後經歷慘痛
如果因為人地變老而唔邀請佢拍續集，咁未免太不近人情。
網上圖片
《壯志凌雲2》將會喺下年上畫，靚佬湯依然都係咁靚仔有型，但係前作女主角姬莉麥基里斯(Kelly McGillis)就畀網民嫌棄佢走晒樣，現年六十二歲嘅佢比起佢嘅年紀就老得多，但其實佢老得咁快背後係另有原因。
網上圖片
姬莉麥基里斯喺演出《壯志凌雲》之後令佢登上事業高峰，當年嘅28歲嘅佢同細5年嘅湯告魯斯拍拖都完全冇違和感。但歲月逼人，時至今日嘅姬莉身形走晒樣，外貌都變得甚為蒼老，仲要畀網民窒佢可以同湯告魯斯做兩母子。
網上圖片
但係對於姬莉嚟講，外表變成點都唔重要，佢喺幾年前嘅訪問提到寧願自然變老，都唔想盲目維持美貌。而且佢仲提及到《壯志凌雲》續集，講明自己唔會有機會演出，因為佢認為電影行業唔好善待五十歲以上嘅女人。姬莉仲話唔會去染頭髮、打Botox或者拉皮，佢希望做一個性格演員。
網上圖片
不過，姬莉急速衰老嘅原因除因為佢個選擇使然之外，其實同佢嘅悲慘童年經歷有關。喺2016年嘅時候，姬莉畀女狂徒闖入屋企襲擊，大難不死嘅佢喺Facebook道出自己喺12歲嘅時候曾經畀3個男人強姦。但係不幸似乎一直都伴隨住姬莉。喺1979，姬莉去左紐約讀戲劇學校，喺嗰一年佢畀人用槍指住個頭打劫。不幸嘅事接連發生。喺1982年，有兩個男人持刀闖入佢間屋，強姦同襲擊佢。當時姬莉以為自己一定會死，好彩最後及時趕到逃過一劫，兩個凶徒一個被判入獄三年，另一個因為證據不足而無罪釋犯。
網上圖片
姬莉表示，喺遇襲之後嘅幾個星期都食唔落飯、瞓唔到覺、全身顫抖，甚至連呼吸都有困難，之後仲酗酒逃麻醉自己，搞到暴肥三十磅，一度自殘身體，最後接受治療。《壯志凌雲》嘅表面風光，其實鏡頭背後隱藏無盡傷痕。
網上圖片
喺事業高峰之後，姬莉淡出銀幕，照顧兩個女。其後結過兩次婚，喺2009年出櫃，承認係同性戀，但後來又分手收場。比起年月，歷年嘅人生苦難先係令佢老得咁快嘅元凶。而家姬莉就開班教人演戲，同做義工幫有需要嘅人戒毒，算係苦盡甘來。
