荷里活影壇獅子王 美高梅95年堅持真獅子拍攝片頭LOGO
菠蘿包冇菠蘿，獅子王冇獅子。
網上圖片
《獅子王》近來正式上畫，呢部「真人」版係攝製團喺VR廠拍成，咁姐係話大家喺電影見到嘅場景同動物都係用CG特效畫成。不過其實就真係有獅子演員，美高梅電影公司嘅經典獅子咆哮嘅Logo係用左真正嘅獅子拍攝。
網上圖片
網上圖片
但其實係點樣拍成嘅呢？早前網上就流傳左一張美高梅為拍攝而張獅子五花大綁嘅相，相當殘忍。但其實真相係點樣呢？今日就同大家分享下。
喺1924年開始，美高梅開始用獅子頭做招牌，由美國知名公關專家Howard Dietz設計。第一隻獅子演員係Slats，當時係拍無聲片段，所以Slats只係望住鏡頭冇嗌。
直到1928年，美高梅開拍有聲電影《南海白影》，Slats退伇，由另一隻獅子Jackie演出，而且仲會吼叫，開始左獅子咆哮嘅版本。
而且美高梅以前都拍低Jackie嘅拍攝花絮，原來喺開拍之前要同Jackie沖左涼先。睇返條片，Jackie真係得意與危險並重。
喺1932年，因為要拍彩色電影嘅版本，所以就換左另一隻獅子Telly，到左1932年就由Coffee頂上。
而1934年嘅獅子Tanner，美高梅仲用左22年。
之後嘅George雖然只係演出左兩年，但係就有頭部擺動嘅兩個唔同方向嘅版本。
去到1957年，就輪到Leo登場，呢個版本一直沿用至今，亦都有咆哮兩聲同三聲嘅版本，相當威武。喺2014年嘅時候，美高梅九十周年，佢地仲安排新生代LEO去荷里活星光大道中國劇院打手印。
網上圖片
但係，網上一直都流傳左一張相，就係美高梅電影為左拍攝獅子頭招牌，不惜將獅子綁喺枱度，極為唔人道，有虐待動物之嫌。但其實呢張相只係經PS過，係獸醫要為獅子做磁力共振檢查身體先會咁做，只係網友惡作劇，換左美高梅嘅標誌先搞到大家有所誤會。
