《Joker》影帝如何煉成小丑之笑？
佢好似成日都對住你笑，笑到心都寒埋。
網上圖片
由康城影帝祖昆馮力士主演嘅DC獨立電影《Joker》，喺四月頭公布預告嗰陣已經引起唔少影迷關注，而且電影仲入圍埋第76屆威尼斯國際電影節主競賽單元，有機會贏到金獅獎。
網上圖片
早前嘅《自殺特攻：超能暴隊》曾有傳言指，飾演小丑嘅謝勒力圖會無時無刻都會入晒戲，例如會送死老鼠畀其他演員。咁馮力士又係點樣準備今次嘅小丑呢？
網上圖片
喺預告入面，小丑令觀眾覺得有種詭異嘅感覺，可能係因為片中嘅小丑係又笑唔係又笑，令觀眾覺得心寒。最近馮力士接受意大利媒體 Il Vernerdi 嘅訪問，佢同大家分享自己嘅演技心得，首先一定要練習小丑笑聲，因為要完美演繹小丑，第一件事就係要搞清楚小丑點笑。
題外話，King Sir喺《賭神3之少年賭神》入面都係笑得相當出神入化。
網上圖片
網上圖片
馮力士睇左大量嘅影片做功課，呢啲片就係「病態性發笑」（Pathological Laughter and Crying，PLC）患者嘅片段，即使病人受到少少刺激就會不由自主咁狂笑或者狂喊，但係呢種笑或喊係唔關情緒問題事，而且冇明顯嘅發病原因，會嚴重影響病人嘅生活。馮力士表示佢睇過好多片，嗰啲病人都笑得非常痛苦，佢認為係神經失調嘅一種。
網上圖片
《Joker》由《醉爆伴郎團》系列導演托德菲臘斯透露，雖然電影係改編DC嘅反派角色「小丑」，但導演就話呢部戲唔會跟隨任何原著設定，將會係一個全新嘅小丑起源故事。今次除左有馮力士之外，仲殿堂級巨星羅拔廸尼路演出。
《Joker》將於十月三日喺香港上畫。
網上圖片
