2019下半年必睇嘅十部荷李活大作
除左英雄片之外都仲係有唔少選擇嘅。
踏入2019年嘅下半年，唔少大製作例如《復仇者聯盟》、《蜘蛛俠》都已經上左畫，不過嚟緊一樣有唔少佳作值得入場支持。今次就溫馨提示下嚟緊，下半年值得留嘅十部電影。
1.《小丑回魂2》
上畫日期：九月十二日
網上圖片
今集故事係上集嘅三十年之後，「廢柴聯盟」本身都分別有自己生活，但係怪異魔靈每隔廿七年就會重返緬因州德里市，所以各奔前程嘅廢柴聯盟再次集合，今次仲揾左兩大明星「X教授」占士麥艾禾、金球獎影后謝茜嘉翠絲頓主演。
2.《大叔的愛：LOVE or DEAD》
上畫日期：九月十二日
網上圖片
日劇《大叔的愛》相當受歡迎，令沉寂一時嘅日劇再次受關注，之後隨即宣布開拍電影版同埋第二季。電影版一早喺八月已經喺日本上畫，而家終於會嚟到香港。今次電影將會新角色加入，部分場景仲會喺香港取景。
3.《星際任務》
上畫日期：九月廿六日
網上圖片
《星際任務》由畢彼特主演，講述地球突然受到宇宙風暴襲擊，地球陷入能源危機，人類隨時覆亡。畢彼特受命去火星基地，拯救地球。而且，佢失蹤多年嘅老竇好可能喺外太空！早前電影喺威尼斯影展搞全球首映，傳媒影評人一致好評。
4.《Joker》
上畫日期：十月三日
網上圖片
DC今次改編最受歡迎嘅反派角色小丑，康城影帝祖昆馮力士係第五位演員飾演小丑。電影講述小丑點樣成魔，成為最強奸角，單睇幾分鐘嘅預告已經感受馮力士嘅精彩演出，有評論指今次馮力士絕對有機會問鼎奧斯卡影帝。
5.《雙子任務：疊影危機》
上畫日期：十月十日
網上圖片
電影由李安執導，韋史密夫主演，今次史密夫一人分飾兩角。故事講述美國國安局特工畀年輕版嘅自己追殺。今次電影係每秒120格頻率、4K、3D最高規格拍攝，務求帶畀觀眾最強實感。
6.《黑魔后2》
上畫日期：十月十七日
網上圖片
《黑魔后2》繼續由安祖蓮娜祖莉主演，今次仲有天后米雪菲花飾演皇后，今集故事講述奧羅拉公主同菲臘王子準備婚禮，養母黑魔后準備同皇后大鬥法。
7.《神探俏嬌娃》
上畫日期：十一月十四日
網上圖片
呢部電影係改編自七十年代嘅同名電視劇，喺2000年曾經畀人翻拍成電影，今年又再推出最新嘅改編《神探俏嬌娃》。三位Angels就換人做喇，包括：姬絲汀史超、娜奧美史葛、艾拉巴連斯卡。其中艾拉仲係同時兼任導演，可能今次會更有新意思。
8.《魔雪奇緣2》
上畫日期：十二月廿一日
網上圖片
Elsa同Anna 全新嘅冒險故事，由原班人馬聲演，又可以畀新嘅主題曲洗腦喇。
9.《Cats》
上畫日期：十二月十九日
網上圖片
由經典音樂劇改編，而且由樂壇天后泰勒絲主演，另外仲有占士高登、珍妮花赫遜，絕對係明星級陣容。
10.《星球大戰：天行者崛起》
上畫日期：十二月
網上圖片
星戰系列三部曲嘅最後一章，血統論將會喺今集完結，早前嘅海報就預示畀大家知將會有Rey同Kylo Ren嘅格劍對決，而背影仲襲罩住Darth Sidious嘅笑樣，惹嚟唔少討論。相信到時正式上畫嘅時候會引嚟新一股熱潮。
