場內場外大鬥法 速龍嘲笑公鹿似「斑比」
到底係「花生味濃」定「火藥味重」？密爾沃基公鹿鬥多倫多速龍，堪稱「場場勁打心理戰」，公鹿上一場先播完「恐龍仔班尼」主題曲擾敵，今仗又有新搞作，出動Fans「侮辱」對手，但最終速龍笑到最後，以87:76輕取第四回合。
「字母哥」安迪度安寶（左）輸到「趴喺度」。（AP圖片）
話說上回的Game 3，公鹿成功以「班尼的主題曲」，在主場嚇走速龍，亦令迪羅山手感全無。來到Game 4，公鹿故技重施，再播班尼的另一首主題曲，但似乎效果一般。
再睇公鹿Snapchat，原來不單止播歌咁簡單，仲搵埋吉祥物Bango影相恥笑對手，舉字牌話：「知唔知點解速龍隊無官方網站？因為佢哋拎唔到第三個「W」（網站=www）（W=win，解作拿不到第三個勝仗）。」
網上圖片
網上圖片
半場休息時間，球隊通常會安排活動，又或者邀請Fans玩遊戲間場，公鹿點會放過大好的「侮辱對手」時間？請來穿上「字母哥」安迪度安寶球衣的女觀眾，踢走「恐龍」公仔，再轉身上籃。
網上圖片
網上圖片
可惜的是，Game 4的比數不似公鹿預期，速龍球員未受影響，尤以迪羅山「完全上力」，貢獻33分，協助球隊取得勝利。不過即使輸波，公鹿Fans誓不罷休，完場前還不停大叫：「公鹿將於第6場賽事取勝」。
AP圖片
然而，今仗受盡「屈辱」的速龍，於官方Twitter反擊，嘲笑公鹿似「小鹿斑比」，鹿死龍口。Game 5又到速龍主場，看來又會有海量的「心理戰」打擊公鹿吧。
網上圖片
