【蜘蛛俠】SONY總裁確定蜘蛛俠加入《毒魔2》 唔洗靠Marvel一樣掂
迪士尼就係分唔清莊閒先會冇左蜘蛛俠。
網上圖片
SONY Picture同Marvel Studio因為《蜘蛛俠》嘅問題搞到反晒面，喺蜘蛛俠退出MCU之後搞到全球影迷大崩潰，主角湯賀倫（Tom Holland）仲unfollow埋SONY同Marvel，實行沉默抗議。
網上圖片
早前有外國媒體就報導其實迪士尼同SONY一路都有講，迪士尼仲「格外開恩」，只要SONY應承九個條件就可以畀蜘蛛俠返去MCU，睇下迪士尼幾咁大方。
網上圖片
SONY一路都知道影迷都好想見到蜘蛛俠同毒魔同場演出，早前外國媒體踢爆其實湯賀倫有喺《毒魔》客串，不過到正式上畫嘅時候，迪士尼同Marvel就要求SONY刪走蜘蛛俠嘅戲份。本來SONY以為只要湯賀倫唔着蜘蛛俠戰衣，單咁以彼得柏加嘅身分演出都係冇問題，但最後迪士尼大石砸死蟹逼SONY就範。
網上圖片
早前SONY總裁Tony Vinciquerra表明蜘蛛俠同《毒魔》加埋其他角色合併，佢相信就算蜘蛛俠離開左MCU，喺SONY發展一樣會咁掂。Tony Vinciquerra仲表示：「我地同Kevin Feige喺《蜘蛛俠》嘅電影系列合作得相當好，我地都好尊重對方。不過SONY都有相當出色嘅工入人員，而且Kevin Feige唔係做晒全部工作。」言下之意，啫係話之前蜘蛛俠嘅成功，唔係話靠晒Marvel，SONY自己做埋其實係冇問題。
網上圖片
蜘蛛俠將會加入SONY旗下嘅《毒魔2》，有指呢部戲將會定檔喺2020年10月2日上畫，繼續由湯哈迪主演，到時影迷就得償所願睇到佢地同場演出。另外，有傳指蜘蛛俠將會加入謝拉力圖主演嘅《Morbius》。睇嚟SONY要用盡蜘蛛俠，展開佢嘅獨有宇宙世界。
