除左《小丑回魂2》之外仲有唔少經典電影改編自史提芬京嘅小說
話明大師，又點止得一本作品拍成電影。
《小丑回魂2》今個禮拜己經上畫，呢部電影係改編自驚慄大師史蒂芬京嘅小說。大師佳作無數，咩類型都有，今次就同大家分享下六部改自史蒂芬京作品嘅電影。
1.《月黑高飛》（1994）
網上圖片
銀行家Andy本來打算殺左佢老婆，因為對方派帽畀佢，不過最後臨崖勒馬冇做到。點知喺嗰晚佢老婆同姦夫畀人殺左。所以Andy被判無期徒刑，喺監獄入面佢識到專做黑市交易嘅摩根費曼，Andy仲憑住佢嘅專業知識喺監獄入面生活得唔錯。坐左二十年監，Andy睇清晒官僚幾咁腐敗，佢決定要逃獄以證清白。
2.《綠里奇蹟》(2000)
網上圖片
湯漢斯係路易斯安那州金山監獄嘅獄警，嚟到呢個監獄嘅犯人都係畀判死刑等坐電椅。一個叫John Coffey嘅囚犯嚟到，係一個惡形惡相、七呎身高嘅黑人。但其實John係一個好人，佢被控姦殺一對姐妹，只係因為有輔警見到佢喺河邊攪住兩條屍喊。之後湯漢斯發現，原來John天生擁有治癒嘅神力，佢將湯漢斯嘅陳年病痛醫好左。同時都講埋原來佢當時係想醫好嗰兩姐妹，但可惜太遲。但點解佢畀人屈都唔出聲呢？
3.《閃靈》(1983)
網上圖片
由電影大師史丹利寇比力克執導嘅神作，故事講述作家積尼高遜喺旅遊淡季畀人請左一間豪華酒店做兼職幫補家計。因為冇錢，所以就算間酒店死過人都好，積都決定返呢份工。積一家人入住酒店之後，怪事連連，積變得越嚟越癲喪。
4.《1922》(2017)
網上圖片
由Netflix改編史提芬京嘅電影，一個農夫寫自白書，話自己殺左老婆，但呢個只係恐怖故事嘅開始。
5.《霧地異煞》(2007)
網上圖片
有一晚因為打風，搞到成個小鎮都停晒電兼起霧。David惟有帶埋囝囝同老婆去超市買必需品。點知突然見到一堆成身血嘅鎮民衝入去超市，成班鎮民緊鎖門窗，原來出面嘅迷霧潛伏左外星生物。喺起市嘅鎮民要想盡法奮力求生。
6.《小丑回魂》(2017)
網上圖片
故事講述喺緬因州德利小鎮嘅細路仔係咁失蹤，差佬就下令每日夜晚七點後宵禁，喺鎮入面有一班小朋友見到一個奇怪嘅「小丑」。阿Bill因為一直都冇辦法克服細佬過生嘅痛苦，所以決心調查細佬點解會失蹤。之後佢發現叫「潘尼懷斯」嘅小丑，原來身邊每個朋友都見過「佢」。
