蜘蛛俠重返MCU又有新轉機？今次輪到SONY開出兩個條件
仲刺激過美中貿易戰。
網上圖片
湯賀蘭飾演嘅第三代蜘蛛俠，喺MCU旗下大受全球觀眾歡迎，早前版權持人SONY Picture就同迪士尼反面，搞到蜘蛛俠要離開MCU，令到好多影迷都唔高興。不過日前又傳出談判形勢有新轉機，大家可能又會有機會見到蜘蛛俠可以重返MCU。
網上圖片
最近有傳指SONY 開出兩個條件，只要傾得成就可以等蜘蛛俠再次Home coming。早前迪士尼就開出九大條件逼SONY應承。根據外國媒體《We Got This Covered》報導，而家SONY調轉頭開返兩個條件：
條件一：要求所得利潤同迪士尼七三對分，當然係迪士尼佔三成。
條件二：《毒魔》要加入MCU。
網上圖片
其實呢個兩要求睇落都合理，之但係目前雙方都係冇辦法達成共識。早前羅素兄弟就呢次談判公開發聲，佢地認為SONY今次犯左會死人嘅錯誤。佢地覺得SONY以為自己可以學到奇雲費治（Kevin Feige）嘅方法實在太天真，因為奇雲係用左好多年嘅經驗，先可以令出色嘅故事喺商業上得到成功。成功之道唔係一日就可以學得識，所以羅素兄弟覺得SONY做錯晒。
網上圖片
咁暫時就未知迪士尼肯唔肯應承SONY，但係湯賀蘭就一定會繼續做蜘蛛俠，因為SONY揸實佢份演員合約。同埋湯賀蘭早前都有公開撐SONY。佢指SONY對佢非常之好，《蜘蛛俠：決戰千里》喺全球之所以咁成功都係多得SONY嘅支持、技術同埋承諾。佢仲覺得蜘蛛俠未來可以繼續留喺SONY嘅度係相當穩陣。
網上圖片
當然一眾影迷都係想蜘蛛俠可以重返MCU做鐵甲奇俠嘅接班人啦，照而家牌面睇其實迪士尼都唔算蝕底。早前兩家反面嘅原因係迪士尼要晒所有蜘蛛俠嘅周邊利潤，兼要五五對分票房分紅。而家SONY嘅條件係七三分蜘蛛俠嘅利潤，自然係票房再加埋周邊嘅分紅，計落條數未必會賺少過之前嘅條件喎。不過迪士尼如果要賺到盡就冇辦法喇，其實退一步自然開闊天空。
