《愛爾蘭人》荷李活證明青春可以常駐 羅拔狄尼路大銀幕回復年輕
反觀港產片《廉政風雲：煙幕》洗左二千萬令張家輝同劉青雲變做膠樣。
由荷李活大導演馬田史高西斯（Martin Scorsese）籌備十年、兩大影帝羅拔狄尼路（Robert de Niro）同阿爾柏仙奴（Al PAcino）主演嘅新片《愛爾蘭人》（The Irishman）將會喺11月1日喺美國上畫，喺11月27日就會上架Netflix。
網上圖片
《愛爾蘭人》改編2003嘅小說《I Heard You Paint Houses》，講述羅拔狄尼路飾演退役老兵法蘭，喺打完二戰之後就轉行以做老千同殺人維生，喺預告見到法蘭收到阿爾帕仙奴扮演嘅工會主席占美嘅電話，問佢：「聽講你專門幫人搞油漆裝修？」即係暗示死人嘅血會彈到成幅牆都係，係確認對方係唔係殺手嘅暗號。
網上圖片
法蘭唔單止係個出晒名嘅殺手，而且佢仲同黑社會大佬賣命，而且佢同占美嘅失踨案都有關係，《愛爾蘭人》講出黑社會、殺手同政客之間嘅秘密。新戲延續返馬田史高西斯嘅經典黑幫片風格，例如：《盜亦有道》、《賭城風雲》等等，有外國影評人仲認為新作氣勢逼人，更被視為出年奧斯卡大熱。
網上圖片
《愛爾蘭人》片長三個半鐘、預算高達12.5億港元，兩樣都打破晒馬田史高斯嘅職業生涯紀錄。拍到咁貴除左係要畀兩位影帝嘅人工之外，同埋因應劇情需要而要為角色回春，CGI技術係好貴下。唔係就咁飲無添加嘅膠蛋白就得架，科技與金錢，兩大元素缺一不可。
網上圖片
因為《愛爾蘭人》嘅時代橫跨幾十年，羅拔狄尼路由退伇老兵做到晚年，喺預告起碼睇到佢以三個唔同年齡階段嘅造型，阿爾帕仙奴都係咁。一定要利用先進嘅電腦特技，先可以營造到逼真嘅效果，雖然有外國網就彈兩位影帝個回春樣好膠，但其實已經好出色。
網上圖片
其實近年荷李活成日都會用到類似嘅技術，例如《Marvel隊長》嘅森姆積遜（Samuel L. Jackson）為左配合電影劇情喺九十年代發生，所以佢做嘅神盾局局長都要變返後生；喺《美國隊長3》裏面嘅羅拔唐尼（Robert Downey Jr.）、《蟻俠》的米高德格拉斯（Michael Douglas）都成功回復年輕。
網上圖片
以上咁多部Marvel電影，都係由美國出名電腦特技公司Lola VFX負責幫主角變返後生；而《愛爾蘭人》就揾左佐治魯卡斯（George Lucas）創辦嘅ILM，同埋另一間個總部喺都柏林嘅SSVFX，一樣咁架勢。
網上圖片
早前港產片《廉政風雲煙幕》，亦都見到張家輝同劉青雲變成大學生嘅片段，導演麥兆輝接受傳媒訪問嗰陣就表示原本想揾荷李活公司去搞，但導演認為對方獅子開大口，惟有將貨就價揾左本地公司，最後兩位香港影帝變左膠樣。
網上圖片
一分錢一分貨係永恆不變嘅定律，既然唔夠錢就應該要諗下其他方法，唔係下下靠執生頂硬上就得架喇。
網上圖片
