十部秋季日劇推薦 (上)：木村拓哉/阿部寛/米倉涼子新作
美中不足嘅係，《不能結婚的男人》續集見唔到夏川結衣。
繼夏季日劇之後，嚟緊又到秋季日劇嘅時間，今次日本一線巨星空群而出，包括：木村拓哉、阿部寬、米倉涼子、中谷美紀、藤岡靛、生田斗真、福士蒼汰、高畑充希。有成十套日劇，成個十月唔洗咁悶。
1. 《Grand Maison 東京》（10/20 首播）
網上圖片
天王木村拓哉嘅新劇《Grand Maison 東京》喺十月二十日就會首播，佢今次就飾演天才廚神，本來佢喺巴黎開左間拎到米芝蓮二星嘅餐廳，但因為一次意外搞到人生跌落谷低。直到佢遇到女主廚鈴木京香，之後重新做人，以三星名廚為目標而奮鬥。睇返之前嘅官方劇照，睇嚟男神仲係咁靚仔。
2.《Doctor-X 6》(10/17 首播)
網上圖片
近年日劇嘅收視保證《Doctor-X》系列又再同觀眾見面，劇集繼續以東京帝國大學醫院做背景，嚟到令和時代，醫院面對更大難關，陷入破產危機。一個令多間企業重生嘅投資人就計劃重建醫院，引入AI技術，又搞到有權力鬥爭。女主角米倉涼子已經係收視天后，今次仲有全新陣容，一定再成為收視冠軍。
3.《還不能結婚的男人》(10/8 首播)
網上圖片
相隔十三年，經典日劇《不能結婚的男人》推出續集《還不能結婚的男人》，阿部寛繼續做仍然單身嘅毒撚建築師，今次佢遇到三個女人，陷入四角關係嘅阿部寛唔知今次可唔可以成功結婚呢？不過，前作女主角夏川結衣今次畀人換走，睇怕會影響收視。
4.《四分鐘的金盞菊》（10/11 首播）
網上圖片
呢部劇改編自同名漫畫，福士蒼汰、菜菜緒、橫濱流星主流。故事講述救護員男主角可以睇到其他人會死，佢見到暗戀嘅家姐（step sister）將會喺一年之後死，所以男主角就要諗計救人，而4分鐘就係急救嘅黃金時間。
5.《G 弦上的你和我》（10/15 首播）
網上圖片
女星波瑠喺前年主演話題作《其實並不在乎你》，今次就飾演辭職之後仲要畀未婚夫悔婚嘅雙失中女，因為太得閒所以就去左報小提琴興趣班，喺班入面識到靚仔大學生同因為婆媳問題而煩惱嘅師奶，三人展開一段互相治癒嘅故事。
