【JOKER小丑】影帝華堅馮力士五部演技爆燈之作
可能你會唔鍾意《JOKER小丑》，但應該每個人都會同意華堅馮力士演技出色，絕對要贏奧斯卡。
通常演員扮得JOKER都係證明佢地演技超班，相信每個睇完《JOKER 小丑》嘅觀眾都會認為男主角華堅馮力士演技冇得彈，就算佢贏埋嚟緊呢一屆奧斯卡影帝一啲都唔奇。今次就同大家分享下華堅馮力士嘅五部代表作。
1.《JOKER 小丑》(JOKER, 2019)
網上圖片
相信都唔需要多介紹，導演托德菲臘斯(Todd Phillips)求左華堅馮力士幾個月先至得佢同意接接呢部戲。華堅仲專登為角色減四十磅，每日只係食一個蘋果，搞到自己都有少少精神錯亂，所以喺戲中見到佢嘅演出可能唔係演技。
2.《獨行煞星》(You Were Never Really Here, 2017)
網上圖片
華堅馮力士喺呢部《獨行煞星》飾演一個退伍軍人，因為退伇之後其他謀生技能而轉行做殺手，佢收錢做嘢，由一班綁匪手上救返被逼做賣淫嘅少女，以暴易暴係惟原則，所以戲中都有唔少血腥畫面。因為華堅演技出色，所以佢喺2017年憑《獨行煞星》贏左康城帝。
3.《觸不到的她》(Her, 2013)
網上圖片
華堅馮力士喺《觸不到的她》飾演一個婚姻失敗兼孤單嘅代筆作家，但係後來就同女聲人工智能Samantha 發生感情。華堅馮力士憑藉呢部戲成功拎到第七十一屆金球獎最佳男主角提名。
4.《大師》(The Master, 2012)
網上圖片
由大師保羅湯士安達臣 (Paul Thomas Anderson)執導嘅《大師》，華堅馮力士喺戲中飾演一個退伍軍人，佢當完兵重返美國之後，因為精神出現問題搞到冇辦法重新展開新生活。直他佢遇到Lancaster Dodd，喺對方嘅循循善誘之下慢慢打開心房，逐漸陷入邪教組織。華堅喺《大師》入面嘅精彩演出，成功贏左第六十九屆威尼斯電影節最佳男演員，同埋拎到奧斯卡同埋金球獎最佳男主角提名。順帶一提，因為華堅自細因為父母嘅緣故而喺邪教長大，可能因為有相關經驗而特別好戲。
5.《弦途有你》(Walk The Line)
網上圖片
《弦途有你》係改編自著名民歌手尊尼卡殊(Johnny Cash)，華堅成功演繹到佢大起大落嘅人生，由高峰跌落谷底再到重新振作嘅經歷。其實華堅除做戲叻之外，喺音樂方面都有返咁上下造詣，佢喺2010主演嘅偽紀錄片《I'm Still Here》就飾演一個rapper，佢喺戲中大開金口，當時為宣傳呢部戲仲宣布唔再做戲要專心音樂事業。當然唔係真。
