【我和父親的Final Fantasy XIV】一個遊戲重建父子關係 FF的前世今生
《最終幻想》係同《勇者鬥惡龍》有關，《勇者鬥惡龍》又係同《Ultima》、《Wizardry》相關。最近仲係咁改編做劇集同電影。
《我和父親的Final Fantasy XIV》講述男主角發現自己同爸爸關係日漸疏遠，諗返起上次同爸爸最開心嘅日子，已經係三十年前佢買左《Final Fantasy III》一齊打機嗰陣。於是阿仔度到一個辦法，就係同爸爸一齊玩《Final Fantasy XIV》，然後再以網友身分同佢一組隊，重新認識老竇。由1990年推出嘅《FF III》到《FF XIV》，接近三十年仍然可以吸引父子兩代繼續玩呢個經典糸列作，究竟呢款被譽為「國民RPG」係點樣嘅作品。
網上圖片
日本有兩款最出名嘅經典RPG，第一隻係《Final Fantasy》(簡稱：《FF》)，第二隻係《Dragon Quest》(《勇者鬥惡龍，簡稱《DQ》。要知點解《FF》咁經典，就要了解《DQ》先。
網上圖片
喺1986年，任天堂己經推出左紅白機，當時只係興動作同射擊game，就未有「角色扮演遊戲」（RPG），有兩個日本後生仔：：堀井雄二同中村光一，兩個因為參加左一個遊戲開比賽而變成朋友，決定將兩款自己鍾意嘅遊戲《Ultima》（創世紀）同埋《Wizardry》（巫師）炒埋一碟，將俯瞰式地圖冒險同迷探索迷宮過關兩大元素結合，之後就誕生左史上第一隻「日系角色扮演遊戲」（JRPG）。《DQ》第一集面世嘅時候因為太有創意，搞到唔係個個玩家都鍾意，直到《DQ III》嘅時候先轟動全日本，當時一推出四圍排晒長龍爭住買。
網上圖片
與此同時，一間叫做Square嘅遊戲廠商因為財政問題而即將執笠，公司入面嘅製作人坂口博信就好鍾意《DQ》，決心要開發一隻仲好玩過《DQ》嘅RPG，佢就將呢款遊戲改名做「Final Fantasy」，因為開發失敗嘅話，公司就會冇晒錢而正式執笠。當然坂口博信就唔係照抄《DQ》，佢加入左好多全新嘅元素：橫向戰鬥畫面、歐洲神話、水晶、飛空艇、召喚獸等等。最後當然係《FF》完滿成功，成為日本第二款「國民RPG」。
網上圖片
《FF》要喺《DQ》之後成功跑出，其中三大元素缺一不可，首先係程式編寫。喺第一集《FF》開發人員名單上面，有一位叫Nasir Gebelli嘅伊朗裔程式編寫員，佢曾經幫Apple II電腦開發遊戲，不過因為Atari遊戲機推出而搞到公司執笠，去日本發展去任天堂見工，但最後冇請到，直至佢喺某個party見到坂口博信，好比良駒遇見伯樂。
網上圖片
Nasir嘅程式編寫技術獨步業界，其中最犀利嘅就係為《FF》加任左可以喺地圖隨意飛行嘅飛空艇，以快四倍速度去航行，當時連賽車遊戲都做唔到呢種速度。而且Nasir仲喺地圖加埋船身陰影增強實感，令到所有玩家都覺得好有新意，所以之後每集嘅《FF》都會有飛空艇。不過之後Nasir Gebelli做完《FF III》之後就離開Square，淡出遊戲業，選擇同屋企人過平靜生活。
網上圖片
其次係遊戲風格，如果要拍得住《DQ》，《FF》就一定要有完全唔同嘅獨立風格，當最重要就係美術設計。《DQ》揾左漫畫界傳奇鳥山明負責人物設定，而Square就揾左風格完全唔同嘅天野喜孝。鳥山明稱霸漫畫界，而天野喜孝就擅長舞台劇美術同服裝設計。佢嘅美術風格就同《FF》嘅幻想主題相當之夾，輕瀟嘅靈動嘅距離感令到玩家有更大嘅想像空間，投入呢個幻想國度。
網上圖片
最後最重要成功要素就係遊戲總監坂口博信，《DQ》比較偏向合家歡，好少有政治鬥爭，角色都冇乜生離死別。《FF》相對就會「現實」得多，主角成日都會遇到離別嘅遺憾，其中最震撼莫過於《FF VII》，好多玩家都估唔到女主角中途真係死左，好多人都忍住喊。坂口博信因為喺做《FF III》嘅時候屋企火燭，阿媽因為咁而過生，當年只係得廿幾歲嘅佢大受打擊，佢決定將悲痛化為作品，其中《FF IV》、《FF V》、《FF VII》同《FF X》都有火燭嘅情節，佢希望玩家可以同主角一齊經歷至愛離別，學識浴火重生勇於反抗惡勢力。
網上圖片
《FF》去到1997年嘅PlayStation版《FF VII》，遊戲畫面由2D變成3D，CG過場充滿電影感，令無數玩家相當驚訝。因為咁出色嘅CG技術，所以Square喺2001製作一部全CG嘅電影《最終幻想：滅絕光年》，可惜電影只係空有華麗皮囊，故事空洞冇癮，呢部1.37億美元預算嘅電影令到Square蝕到入肉，坂口博信仲因為咁而離開公司，Square後來仲要同開發《DQ》嘅Enix合併變成Square Enix。但之後都係要繼續搞電影，喺2005年延續《FF VII》嘅《降臨之子》，同埋最近為左配合《FF XV》而推出嘅電影《Kingsglaive: Final Fantasy XV》，兩部電影成績都唔錯。近年Square Enix仲將遊戲變成真人影視作品，例如將《DQ V》改編成搞笑深夜日劇《勇者彥義》，令到主角山田孝之大受ACG界歡迎，導演福田雄一都成為改媥ACG做真人電影嘅皇牌，例如《銀魂》就係佢導演作品。
網上圖片
近年「遊戲改編電影」就唔係就咁將揾演員將遊戲拍出嚟，而係將遊戲變成現實劇情入面嘅其中一個某介，角色利用遊戲接觸，帶動劇情。例如《我和父親的Final Fantasy XIV》就係改編自一個叫做Maidy嘅網誌，佢定期喺網誌更新點樣同老竇玩《FF XIV》重建關係。呢個網誌喺日本大受歡迎，當年錄得過一千萬瀏覽人次，後來仲改編成小說同日劇，而家仲搬到大銀幕。
