【Watchmen】《守護者》與《保衞奇俠》 蒙面私了武力制暴現實寫照？
呢個時候最啱睇Watchmen。
網上圖片
電影《V煞》（V for Vendetta）話畀世人知人民唔應該驚政府，政府應該要驚人民。一樣都係由Alan Moore原作嘅 graphic novel《Watchmen》都係美國經典漫畫作品，忠於原著嘅電影改編作品《保衞奇俠》（Watchmen）相隔十年推出全新電視版《守護者》（Watchmen），故事由80年代改成現代背景，再次探討蒙面、私了、警民、種族衝突、惡法害民等等嘅議題，相信香港觀眾睇到一定會有共鳴。
網上圖片
《守護者》日前喺首播，相信係自《切爾諾貝爾：傷心的兒童》之後最受矚目嘅HBO劇集。由漫畫、電影再到劇集版嘅《Watchmen》，已經唔係單純嘅娛樂，仲會有好多引起觀眾反思嘅命題，包括：英雄、政府、公義、生命等等。
網上圖片
原作Alan Moore同漫畫家Dave Gibbons喺80年代一齊創作嘅DC漫畫神作《Watchmen》，喺美國漫畫史嘅地位超越同樣係Alan Moore嘅作品《V煞》。如果有睇過《Watchmen》原著，相信都會明白點解呢部作品當年可以擊敗其他文學作品，成為史上第一部贏到雨果獎嘅漫畫。《Watchmen》嘅敍事同表現風格超越其他一般嘅漫畫作品，充滿創意同文學性。
網上圖片
導演薩克薛達（Zack Snyder）拍完《戰狼300》(《罪惡城》原作漫畫家Frank Miller作品)之後，佢喺2009年用左兩年時間去拍電影版《Watchmen》，即係《保衞奇俠》。電影力臻原著嘅沉重風格同埋複雜故事架構，雖然當年票房唔太理想，但係電影務求每格畫面都要還原《Watchmen》風格，相信一班原著fans一定會收貨。同時間《保衞奇俠》都吸引到全世界唔同地方嘅fans，有網友仲搞左個《Watchmen》網站，等大家可以繼續深入研究。
網上圖片
《Watchmen》總共有12期薄裝漫畫，係Alan Moore解構同諷刺超級英雄之作，故事講述四十年代同六十年代由人類蒙面化身而成嘅英雄，佢地私了左好多社會嘅暴力問題，改變左某啲關鍵嘅歷史事件，但係呢班所屬嘅英雄其實全部都係人渣(例如其中一位英雄Comedian 曾經強姦隊友Silk Spectre II )。到左八十年代美蘇核戰一觸即發，政府通過《基恩法案》（Keene Act, 禁止英雄蒙面私了罪犯嘅法案）搞到好多英雄要退休，或者要幫政府做嘢。當「末日鐘」得返五分鐘嘅時候，一直打政府工嘅其中一位保衞奇俠Comedian畀人暗殺，一班退左休嘅超級英雄決定重出江湖查明真相，解除滅世危機。
網上圖片
HBO新版劇集《守護者》，係由《迷》（Lost）同埋《守望塵世》（The Leftovers）監製Damon Lindelof主創，佢表示唔係要重拍《Watchmen》，係好似《聖經》有新舊約嘅分別咁，「原著十二期嘅漫畫成為左我地嘅《舊約》，就正如《新約》面世嗰陣，並有抺走之前嘅事。」
網上圖片
《守護者》係《保衞奇俠》嘅延續，當年嘅智謀Ozymandias殺死幾百萬人拯救世界，惟有有超能力嘅Doctor Manhattan喺南極將蒙面英雄Rorschach炸到變灰之後就離開地球，去到電視版就係一個全新故事。Damon表示：「我地根據原有故事啓發而remix，就好似自身構造嘅板塊會引起預計唔到嘅地震咁，《守護者》會提出新命題，以全新嘅目光去探討而家嘅世界。」今年年頭以電影《愛在無聲的街角》（If Beale Street Could Talk）贏左奧斯卡最佳女配角嘅明星Regina King，繼《守望塵世》之後再同Damon合作，今次喺《守護者》擔任重要角色，佢認為雖然時代背景有變，但有一個核心命題冇改變到，「我地仍然會探索蒙面之下對每個人帶嚟嘅影響。」
網上圖片
《守護者》一開始就出現好多模仿保衞奇俠Rorschach嘅黑白蒙面裝扮嘅人群，氣勢直逼群眾戴住《V煞》面具嘅場面。Rorschach原本好似《Joker小丑》嘅Arthur Fleck，係反社會人格嘅邊緣人，但佢大個左之後就嫉惡如仇、黑白分明，佢留低嘅日記都啟發到世人，佢話過：「已經死左嘅我生存嘅時候唔妥協，而家去送死都唔會後悔或者有怨言。」
網上圖片
但係，《守護者》唔係重演《V煞》嘅私了反暴政劇情，而係將Rorschach同特朗普上任連結，美國有越嚟越多後生仔尚白人至上主義，Rorschach唔係種族主義者，劇集入面嘅白人至上主義者集團Seventh Kalvary用左Rorschach式面具，扭曲左Rorschach為公義私了嘅本意，搞恐怖主義活動，劇集表出現出Watchmen嘅主義點樣傳播開去。
網上圖片
喺原版故事入面，尼克遜做左連任五屆總統，由1969年做到1985年（喺現實世佢係做到1974年）。《守護者》就仲誇張，呼應返原著羅拔烈福競選總統，佢喺劇集由1992年以嚟一路都做總統，成為史上任期最長嘅現任總統，福伯今次仲出山親自演出。呢個架空嘅現代美國，仲硬推唔少新法，例如石油完全畀電力取代，亦都冇左互聯網同手機。仲出現專為美國黑人訂立嘅種族暴力受害者法，指定種族歧視受害者同佢地嘅後代可以終身免稅。
網上圖片
喺《守護者》之中Seventh Kalvary發動種族大屠殺恐怖襲擊，令美國設立《防衞法》，等差人可以保護因為種族暴力受害者法而受益嘅人，等佢地唔洗畀恐怖份子殺死，可以攞正牌戴口罩護自己，唔知特區政府嘅高官會唔會照抄呢？Damon就講到明劇集版會好似原著咁有好多估佢唔到嘅劇情扭橋，喺金像級嘅配樂指導Trent Reznor同Atticus Ross嘅音樂之下，突顯出代《Watchmen》世界嘅警世氣氛。
網上圖片
Damon Lindelof 就話冇睇過舊版《保衞奇俠》嘅觀眾係唔會影響到欣賞《專護者》，當然大家去重温下原版漫畫同埋電影都係好事。
