劇本當年只值一蚊美金？ 《未來戰士》六大趣聞
估唔到大導演都頂爛市... ...
占士金馬倫導演、阿舒華辛力加主演嘅《未來戰士》喺1984年上畫，大受全球觀眾歡迎。呢部電影令到奠定阿諾巨星地位，亦都令金馬倫成為荷李活最炙手可熱嘅導演。最新一集嘅《未來戰士：黑暗命運》喺香港已經正式上畫，而且今年亦都係《未來戰士》上畫三十五周年，今次一齊睇下呢部經典之作有咩趣事。
網上圖片
1.導演發夢攞靈感？
網上圖片
喺占士金馬倫仲未成名嘅時候，佢就做左一部B movie《食人唔?骨》《Piranha II: The Spawning》嘅特效導演，但佢就同導演Miller Drake、監製Ovidio Assonitis反面，去到羅馬為電影勘景嗰陣Miller Drake就走左。於是金馬倫就頂上變導演，不過因為佢同監製都反埋面，搞到佢冇空間發揮，所以佢表示呢部電影唔關佢事。之後可能係因為太大壓力搞到發燒，喺瞓覺嗰陣發惡夢，喺夢境入面佢見到一隻由金屬組成嘅骸骨拎住把菜刀斬自己。後來返到美國，金馬倫就以呢個惡夢為藍本創作左《未來戰士》嘅劇本草稿。
2.原本第一集就有液態機械人？
網上圖片
其實《未來戰士》嘅初稿劇本，係有兩個嚟自未來嘅機械人，一個係機械骨架嘅T-800，另一個係液態金屬機械人，不過因為當時CG技術未完善，所以金馬倫喺第一集放棄左呢條橋，大家喺第一集只係見到T-800。後來科技發達，去到《未來戰士續集》終於見到液態金屬機械人T-1000。
3.原本阿諾係扮人類？
網上圖片
電影公司獵戶座開頭幫《未來戰士》選角嘅時候，本來係想揾阿諾飾演保護莎拉康納嘅人類義士Kyle Reese，不過導演就覺得阿諾已經咁大隻，如果佢做Kyle Reese，咁即係要揾個更大隻嘅演員去做Terminator。之後導演同阿諾見完面之後，佢就更加肯定阿諾先係Terminator。
4.《未來戰士》劇本只值一蚊美金？
網上圖片
雖然金馬倫忍受發高燒之苦，創作出《未來戰士》嘅劇本，但係佢個經理人覺得呢個劇本唔係好掂，所以佢就直接炒左經理人，用一蚊美金賣劇本出去，交換條件係要做導演。買家就係《未來戰士》監製、兼導演嘅第二任老婆 Gale Hurd。佢地拍完《未來戰士》之後就結左婚，四年後就離婚。（主角蓮達咸美頓係金馬倫第四任老婆）。導演接受《Toronto Sun》訪問嗰陣表示好後侮當年用一蚊賣走劇本。
5. O. J. Simpson 原本有機會做T-800？
網上圖片
前提面提過，因為導演覺得阿諾太大隻，所以希望佢做返機械人。可能因為咁嘅原因，獵戶座嘅高層就建議咁上下大隻嘅O. J. Simpson做T-800（前美式足球明星，之後因為謀殺自己老婆而被起訴，但最後成功甩身）。不過導演最後都係心儀阿諾，堅持要佢做T-800。
6. 阿諾喺《未來戰士》有幾多句對白？
網上圖片
因為扮機械人嘅原因，所以阿諾唔會有太多對白，成套戲只係得十七句對白，夾埋先得嗰五十八個詞語，「I'll be back」係其一句。因為阿諾係奧地利人，佢擔心自己口音太重，會講唔好對白，佢建議將「I'll」改成「I will」。但係導演就叫佢唔好教自己寫對白，表示會拍十次，然後揀表現最好嗰take出嚟。
