【蝙蝠俠】揾佢做「謎語人」仲好過揾大明星
唔係出名就大晒嘅。
網上圖片
《JOKER小丑》叫好叫座，男主角華堅馮力士Joaquin Phoenix)仲係今屆奧斯卡影帝大熱，令到DC電影重振聲威，一班DC迷仲好期待可以睇到《吸血新世紀》系列男星羅拔柏迪臣主演嘅《蝙蝠俠》，同埋華納早前就宣布左由保羅丹奴（Paul Dano）飾演反派「謎語人Riddler」。其實之前華納係想搵《華爾街之狼》嘅鍾拿希爾（Jonah Hill）去做謎語人，不過佢獅子開大口，要求嘅片酬居然仲貴過主角，所以最後就搵左收費合理兼係演技派嘅保羅丹奴頂上。
網上圖片
相信各位蝙蝠俠迷都記得九十年代嘅《蝙蝠俠》電影，當時華納都會揾巨星去飾演反派，例如1995年嘅《新蝙蝠俠不敗之謎》就揾左占基利去做謎語人，雖然占基利個朵夠晒響，但係冇觀眾滿意佢嘅表現，所以自此之後就冇再見到佢喺蝙蝠俠嘅電影裏面出現。
網上圖片
雖然保羅丹奴唔夠占基利出名，為人熟知嘅作品應該係《陽光小小姐》同埋《黑金風雲》。導演麥維斯（Matt Reeves）表示，因為今次版本會加入大量偵探元素，佢覺得保羅丹奴嘅氣質好適合，相信今次嘅蝙蝠俠會比之前嘅版本會更加唔同。
網上圖片
講返謎語人Riddler，佢真名叫Edward Nigma，喺1948年十月嘅《偵探漫畫》（Detective Comics）亮相，雖然係DC漫畫嘅超級反派，但係就冇任何超能力，係靠天才智慧去犯案，佢最鍾意喺犯案現場留低謎語，等其他人去解謎。
網上圖片
