清水崇新作《犬鳴村》 都市怪談為題材 嚇到觀眾唔敢睇戲
《犬鳴村》係一部日本鬼片，但係最近喺中國平遙國際電影節做全球首映，莫非去到最後原來呢套戲係冇鬼嘅？
「恐怖大師」清水崇喺執導嘅《咒怨》，喺2003上畫嘅時候成功駕嚇全球觀眾，之後仲改編成荷李活版嘅《不死咒怨》，最近Sony又再一次翻拍《咒怨》。最近清水崇又有新作《犬鳴村》，今次佢以日本其中一個最出名嘅都市傳說「犬鳴隧道」為題材。
網上圖片
「犬鳴隧道」係全日本最出名嘅猛鬼地點，本身犬鳴村係一條住左大約一百個人嘅小村落，因為後來要起水壩，喺1994年，政府要所有村民搬走，最後水壩淹沒左成條村。
網上圖片
人就搬左屋，但係村民啲祖先就冇搬到，所有墳墓跟住成條村一齊沉落水，之後就係咁傳出靈異事件。據聞成日有人見到水壩度見到水底有奇怪嘅光；同埋工作人員成日都聽水底成日傳出好多人嘅叫聲，走去睇下咩事但又咩人都睇唔到；亦都有看更試過喺夜晚巡邏之後就離奇消失，點都揾唔返條屍。之後開始有好多人喺度投水自殺，而且犬鳴隧道成日都發生離奇車禍，最後政府以隧道路面太窄為由封鎖隧道。
網上圖片
犬鳴隧道嘅另一邊就冇封到，所以好多人都去嗰度玩試膽大會，大家去到嗰度都會聯結隊行入隧道。著名日本漫畫家伊藤潤二畫左《隧道奇談》，應該係以呢個傳說作為藍本。今次就輪到清水崇拍攝最新作品《犬鳴村》，劇組仲唔怕死到實景拍攝。早前公開左預告同海報，之前就帶埋新作去左第三屆平遙國際電影展做全球首映，大受好評。據聞喺現場有唔少觀眾頂唔順，睇到一半走左。
網上圖片
《犬鳴村》由三吉彩花主演，故事講述臨床心理醫生森田奏有陰陽眼，成日撞鬼，令到生活好痛苦。有一日，森田奏嘅阿哥同佢女友因為好奇而去左犬鳴村探靈，兩個人差啲出事。雖然佢地最後成功逃走，但係佢女朋友最後自殺死左。阿哥為查出女友自殺原因，佢同幾個朋友一齊重返犬鳴村，結果阿哥失蹤，幾個朋友喺條村附近離奇被殺。森田奏打算揾神秘人幫手，但係犬鳴村嘅咒怨而家先開始，佢陷入極大危機。
網上圖片
清水崇喺映後座談會表示，雖然《犬鳴村》係一部恐怖片，但係電影探討日本由古代流傳到而家嘅一啲習俗，同時希望反映而家嘅社會問題，例如撫養仔女、贍養父母等等。所以導演表示呢部作品似係「親子電影」，佢希望觀眾可以睇完戲之後可以感覺到同自己血脈相連嘅人係存在。《犬鳴村》預計2020年會喺日本上畫。
