《Ｘ你的世界末日》第二季上架Netflix 編劇暗示唔會有第三季
見好就收，向來係神劇定律。
根據外媒EW報導，Netflix 已經發布第二季《Ｘ 你的世界末日》（The End of the F***ing World）嘅正式預告，編劇查理高佛（Charlie Covell）受訪嘅時候就表示今季嘅風格同第一季有啲似但其實又唔一樣。
網上圖片
喺第一季，叛逆少女Alyssa遇見自以為有精神病嘅後生仔James，兩個人一齊開公路冒險，喺旅程上兩人遇到一堆離奇事件，之後差人揾到佢地嘅位置，James就向海邊方向着草，最後以槍聲就結束第一季。
網上圖片
好多人都關心飾演James嘅Alex Lawther仲會唔會喺第二季有戲份，編劇查理就表示佢都答唔到呢條問題，不過佢就表示Alyssa會喺第二季確定返佢嘅人生走向。
查理表示佢好鍾意喺呢部劇集入面，講兩個17歲嘅角色，佢地喺走佬嘅時候突然發現自已經19歲。喺呢個年紀已經係個成年人，就算個感覺唔似都好，查理認為畀Alyssa直接到呢個年紀會好過癮，Alyssa嘅反應係「哎呀，真大鑊，我而家已經係個真正嘅成年人。」
網上圖片
就算今次嘅劇情係有啲嚴肅都好，《Ｘ 你的世界末日》都仲係會保持黑色幽默嘅風格，編劇查理表示今季只係「成熟」左些少。
簡單嚟講，第一季係關於於逃走，第二季就係逐漸接受。
查理就話：「今次嘅故事係講需要停留喺一個地方，人係冇可能成世都逃走，我地一定要停低，重新出發兼開始成長，我諗呢個就係Alyssa喺今季嘅經歷。」
呢部劇集喺2018年1月上架Netflix，當時嘅反應相當之好，團隊都嚇親。查理當時就覺得，如果喺《衛報》有唔錯嘅評價已經好好，佢估唔到呢細規模嘅劇集竟然會喺世界各地有咁好反應，令到佢都相當驚訝。某啲評論認為《Ｘ 你的世界末日》應該一季就完會比較好，但係查理就覺得其實仲可以講多啲同Alyssa相關嘅故事。
網上圖片
劇組度左兩年時間，先至決定推出第二季，佢地先係諗下故事同角色嘅相關問題，然後再考慮下一步應該點行，同埋要諗有啲咩嘢要放棄。今次第二季嘅新角色就有《王牌DJ捲土重來》男星Tim Key，佢飾演酒店老細Gus，同埋《惡女馬克白》女星Naomi Ackie，佢喺劇中飾演Bonnie。
網上圖片
雖然第二季有好多嘢想講，但係查理都係堅持唔劇透，佢表示第二季將會有一個最終結局。咁即係暗示唔會再有第三季。
第二季《Ｘ 你的世界末日》將會喺5/11喺Netflix 上架。
