Netflix最新西班牙話劇集《H后》 巴塞女毒梟故事四大賣點
嚴格嚟講應該係加泰羅尼亞劇集。
Netflix 近年相當重視西班牙語市場，舊年就喺馬德里開左第一間歐洲影視基地。之前Netflix 買左《紙房子》（La casa de papel）嘅版權，喺全球掀起熱潮，之後嘅接線《女職員一族》（Las chicas del cable）、《名校風暴》（Élite）。既然開左間片場就梗係唔好浪費，Netflix 再接再厲推出第五部西班牙原創劇《H后》（Hache），有望再次捲起西班牙熱潮。
網上圖片
《H后》故事藍本源於六十年巴塞隆拿女毒梟Helena嘅故事，Helena原本係做應召女郎，後來成為黑社會大佬Malpica嘅情人。因為Helena相當有野心兼夾性格硬淨，所以冇幾耐佢就晉升到組織高層，把持巴塞港口嘅走私海洛英生意。
《H后》係由《Velvet Colección》編劇Verónica Fernández主創，《白粉梟雄》導演Jorge Torregrossa執導。另外由《幻象》女星Adriana Ugarte、《Velvet Colección》男星Javier Rey主演。
今次就講下呢部《H后》嘅四大賣點：
1. 唔係全西班牙對白，各國演員講返自己母語
網上圖片
呢部劇集唔似其他普通西班牙劇咁全西語發音，《H后》畀返演員用返自己母語去講對白。
導演認為咁做係必要嘅，因為劇中人物嘅互動情節係同相當國際化，例如劇中有個意大利裔嘅美國犯罪份子、喺巴塞隆拿領使館做嘢嘅美國人。同埋呢套劇集一開頭係發生喺巴塞街頭，劇情係關於美國水手想揾應召女郎。因為情節需要，所以要求每個角色講返自己母語都好合理。
2. 真實報導激發創作靈感
網上圖片
雖則劇集係改編女毒梟嘅真實故事，但主創人員就表示當年睇到報紙嘅報導先至引起拍攝呢部劇集嘅諗法。當年嘅報導指出意大利黑手黨大佬點樣建立亞洲到美國走私海洛英嘅路線，黑手黨曾經用過地中海沿岸做港口，包括加泰羅尼亞首都巴塞隆拿港口。
仲有另一篇報導係加泰羅尼亞當局發現到有一堆裝滿左海洛英嘅公仔衝左上岸，因為呢篇報導引起左主創人員嘅興趣，佢地做左好多資料搜集，從中了解到意大利毒販係點樣運毒。結合左唔同嘅元素之後，令佢地創作左呢個故事。
3.充滿黑色電影風格
網上圖片
劇組人員睇左好多不為人知嘅西班牙電影，希望可以建立到六十年代嘅氣氛。導演希望避免拍左啲公式劇集出嚟，所以劇組人員想專注返喺角色度，亦都冇考慮過劇集係咩類型，只係想透過呢套劇集講出一個女人嘅冒險旅程。
4. 冇好人角色，只有掙扎求存嘅人
網上圖片
喺《H后》入面，觀眾好難會見到有完美好人嘅角肥，主創人員認為呢個係關於倖存者嘅故事，佢地相信生活係相當艱苦。佢地設計左複雜嘅角色，唔會只有壞嘅一面。喺劇集初期，觀會睇到某啲角色相當賤格，但後來就會解釋佢地點解會咁做。導演補充第一次睇劇本嘅時候，鍾意呢個故事嘅其中一個原因就係，冇好人亦都冇壞人。
《H后》第一季總八集已經喺Netflix上架。
網上圖片
