馬田史高西斯用四年時間考慮執導《Joker小丑》 堅持超級英雄電影係主題樂園
其實大師係讚賞超英片，覺得呢類片種係另類藝術，唔係個個都拍得好。
網上圖片
馬田史高西斯（Martin Scorsese）最近為宣傳新作《愛爾蘭人》（Irishman）接受各大傳訪問，包括同其他傳奇大師對談，當中最惹火言論當然係「Marvel唔係電影」之說，佢嘅朋友兼大師哥普拉（Francis Coppola）都踩多腳，直指Marvel電影「令人厭惡」。最近馬田接受BBC訪問嗰陣被問到《Joker小丑》「係唔係主題樂園電影」，佢終於第一次親口解答呢部充滿佢電影風格嘅漫畫改編作品。
網上圖片
馬田喺訪問度表示：「我好熟悉呢部電影，亦都同托德好熟（《Joker小丑》導演），我嘅製片去幫手籌備呢部電影，過去四年我都認真考慮緊拍唔拍呢部作品，但我後來真係冇時間。」馬田都承認《Joker小丑》深受佢好多作品嘅影響，不過因為唔同原田而冇辦法親自執導。「我好熟呢個劇本，佢有非常好嘅能量，仲有好演員華堅。」之後馬田亦都有解釋《Joker小丑》同其他一般超級英雄片嘅不同之處：「對於我嚟講，如果我去到下一階段，亦都係呢個角色進化成漫畫角色嗰陣，佢會變得好抽象，亦都係同其他超級英雄唔同嘅地方。」
網上圖片
除此之外，馬田亦都再次講返超級英雄片喺佢心入面嘅地位：「超級英雄片，就正如我之前講過，佢係另一種藝術類型，唔係咁容易就拍出嚟，呢啲電影係一班有才華嘅人拍出嚟嘅好作品，好多後生仔勁鍾意呢啲戲，但我真係認為呢啲就係主題樂園，主題樂園嘅延伸。」另外佢仲提到其實唔係只係得Marvel電影先係咁，早喺七十年代荷李活大片廠已經開始咁做。例如最先咁做係環球影業，當年環球已經搞左片場導賞團，之後仲想將主題樂園同電影結合，再賣飛吸引觀眾入場賺錢。馬田強調冇可能唔畀公司賺錢，但佢堅持電影人一定需要戲院，希望觀眾一定要去戲院睇戲；同埋佢認為電影公司同院商唔好賺到咁盡，留返一個空間畀普通電影人嘅作品喺戲院度放映，還返一個觀影文化畀大眾。
網上圖片
《Joker小丑》雖然同其他超級英雄唔一樣，劇情爭議兼限制級，但直至目前為止全球突破9億美金票房（仲要冇可能喺中國上畫），係自蝙蝠俠三部曲之後華納同DC最成功嘅改編作品。
