前新聞小花Snowy以家庭為重 享受做主持和KOL分享生活點滴樂趣
開美甲店都係佢嘅夢想~
不知何時開始，TVB的天氣女郎成為不少巴打心目中的女神，近有梁凱寧，遠有黃婉曼，而前新聞小花蔡雪瑩（Snowy），更曾一度被網友封為「至索女主播」。Snowy於2014年離開新聞部，之後試過當公關，卻未慣返朝九晚五，最後轉為當自由人。2016年她下嫁上市公司亞洲木薯太子爺朱威霖，三年抱兩，湊成一個好字，從此當幸福少奶奶。
因為樣子甜美，Snowy曾一度被網友封為「至索女主播」，她於一四年辭職，令不少粉絲們傷心。（《東周刊》圖片）
雖已為兩子女之母，32歲的Snowy穿起三吋高跟鞋，外型仍與一般少女無異。自言「坐唔定」的她，坦言仍想幹一番事業，「雖然依家以小朋友為重，但我仍然好享受做主持、做KOL，跟人分享生活點滴嘅樂趣。我嘅夢想係開一間美甲店，因為我好鍾意將啲指甲整得靚靚，心情唔好，睇見都會開心番。」
Snowy說當主播是兒時志願，更視魏綺珊、趙海珠為偶像，「一個女仔靚靚咁坐喺度報新聞，感覺好專業，又權威，2010年面試四次，終於俾我考到女主播，真係好似發緊夢。」（《東周刊》圖片）
據《東周刊》報道，Snowy自稱近年愛上整蛋糕，每個月她都與三歲的囝囝來上堂，當作親子活動，「呢間係我好朋友開嘅烘焙店，我會同呀仔一齊整蛋糕，好開心㗎！早排我仲帶咗TVB舊同事鄭萃雯同林燕玲一齊來上堂，大家敍吓舊，好難得！」
早前Snowy相約一班同期主播林燕玲﹙左﹚及鄭萃雯﹙中﹚一起整蛋糕，度過一個開心的下午。（《東周刊》圖片）
訪問當天，Snowy穿得靚靚，踩着三吋高跟鞋整蛋糕，還要擺Pose影相，似乎已完全擺脫主播影子。「呢幾年習慣晒啦！以前做主播、記者，因要跑新聞，多數着平底鞋；呢幾年轉咗型，成日出席活動，跟丈夫去應酬難免要着高跟鞋，始終女仔都係貪靚嘅。」
四年幾的主播生涯，有笑亦有淚，提起「蝦碌事」，Snowy笑不攏嘴︰「最深刻嘅一次，係有次報晨早新聞，讀到某個地方要交個軍權出來俾北約，我卻講咗交俾北角，好彩係晨早時段，老細未起身睇，嗰時又未興Cap片，咁啱個編輯又唔係好惡，仲喺耳機同我講：『點解唔交俾鰂魚涌呀？』好彩之後即刻去片，否則我實忍唔到笑！」
Snowy發現，做活動主持跟做主播是兩回事，「喺活動做司儀，觀眾唔會特別留意你一字一句，唔需要字字正音，只要流程同時間控制得好，現場反應理想，呢個活動就算成功，所以我覺得做主持好有挑戰性，好好玩。」（《東周刊》圖片）
大學讀新聞系的Snowy，無做主播多年，坦言仍然懷念，「有次做立法會選舉直播，當時我真係緊張到想喊。我企喺廠度，睇住熒幕，見到啲票數不停咁變，成地都係稿，鏡頭前我故作鎮定，但又要聽住編輯喺耳機講嘢，佢哋有時忙中有錯，一時話港島東，一時又話新界東，我唔聽清楚隨時報錯。嗰次係我最緊張嘅Live，好彩出嚟嘅反應唔錯，真係好有成功感。」
無做主播後，Snowy曾接拍護膚品網上宣傳片，大談美容心得，外界反應不俗。（《東周刊》圖片）
既然熱愛傳媒工作，卻又選擇離開，可會跟「被辭職」的傳聞有關？Snowy笑言︰「梗係唔係啦！係當時覺得自己好老，我係87年出世，同期新人已經係92年，你話驚唔驚？嗰時我28歲，事業去到樽頸位，做咗幾年主播，如果我結婚生仔，呢份工我又可唔可以繼續攀上去，定係會愈做愈低？香港主播嘅要求唔同外國，唔可以俾我做到四、五十歲；我又唔鍾意做幕後，如果等到30歲先轉行，條路可能仲難行。加上爸爸13年過身，家姐、哥哥又結晒婚，我覺得媽咪心靈上好需要人照顧。媽咪以前做公務員，當知道爸爸有病，就提早退休照顧佢。爸爸走咗之後，媽咪無寄託，所以我最後決定轉型做公關，希望工作時間穩定啲，可以多啲時間陪媽咪。」
三年抱兩的Snowy指暫不打算追多個，早前一家四口穿起家庭裝行街街，幸福滿瀉。（《東周刊》圖片）
2014年Snowy毅然轉行去會計師樓當公關，然而人算不如天算，做了大半年，因為不習慣朝九晚五模式，最後都決定辭職。「可能我份人唔鍾意坐定定，喺寫字樓坐八個鐘，對我嚟講好辛苦，而且以前份工成功感來得快，挫敗感也來得快，但勝在直接。
