馬田史高西斯投稿紐約時報 大師再次話你知點解Marvel唔係電影
全球化同時亦都帶嚟全球品味單一嘅問題。
早前荷里活大師馬田史高西斯（Martin Scorsese）為左宣傳新作《愛爾蘭人》嗰陣接受BBC訪問，佢訪入面再次解釋點解返點解MCU作品係主題樂園。佢訪問入面提到，喺七十年代嗰陣已經見到環球影業搞片場導賞團，之後環球就一直發展，將電影同主題樂園結合。馬田強調電影公司同戲院老細要畀空間，等大銀幕可以放映電影人嘅作品，但係而家個轉變係會令到電影人慢慢消失。
網上圖片
除此之外，馬田亦都親自投稿到紐約時報，以「等我解釋點解我會話Marvel唔係『電影』」為題去講返呢個月嘅風波。其實馬田從來都有讚過或者踩底Marvel，佢呢幾年都一直擔心緊嘅係電影本身嘅藝術性會消失，呢種藝術包括創作者嘅自由同埋放映場地嘅保留，呢兩樣嘢喺呢十年之間變得好快。2014年，馬田都寫過一封公開信講過而家電影業狀況，喺2016年甚至話「電影已經消失」，而家佢再次解釋返以前講過嘅論點。
網上圖片
喺呢篇紐約時報嘅文章，馬田解釋咩係「電影」。佢認為電影係一種有藝術性、情感同埋精神嘅啟示，同時都係關於人物嘅複雜同埋矛盾，人物之間可以相愛，亦都可以痛恨對方。電影就係喺銀幕度用戲劇化嘅手法去講生活上預計唔到嘅事，同埋可以感受到聲音、畫面以外嘅藝術形式。馬田解釋埋點解會咁評論超級英雄片，佢話不論喺美國定全世界，系列電影已經成為觀眾入場嘅首選，同埋獨立戲院都開始消失緊，網絡串流平台已經雄霸家庭影音市場。馬田強調喺佢識得嘅電影人當中，大家都願意將電影擺喺大銀幕，直接放映作品畀觀眾睇。
網上圖片
其實馬田係擔心純粹嘅「電影形式」會被連根拔起，呢個形式包括製作拍攝、到放映模式。喺而家嘅超英片潮流就更加明顯，去到今時今日，好多電影都為左即食消費而製作，變成一件完美產品。雖然係由好多有才華嘅工作團隊造左呢類「產品」出嚟，但係佢地都缺少左電影嘅核心元素，就係藝術家嘅願景。當然，呢個元素會令到商業投資有好高風險。
網上圖片
MCU成功嘅其中一個因素，係因為故事線安排周密，變相每部電影之間必須統一風格，即使MCU喺全球各地大受歡迎，但係就冇左電影人嘅獨特視野。仔細啲諗下，其實馬田係有道理，全世界嘅觀眾都睇緊同一樣嘢，鍾意緊同一班角色，電影公司就只會一直推出呢類即食型「產品」。
網上圖片
最後馬田提到，本來電影，係娛樂同藝術兩大元素重疊埋一齊，但而家越嚟越少作品係咁樣，兩大元素分別走向極端。佢仲講到喺呢個時候對於想投身電影業嘅人嚟講係相當困難，因為而家嘅藝術環境非常貧瘠。
