《閃靈》四大幕後趣聞 當年入圍金酸莓獎兼差啲逼癲女主角
所謂完美主義，其實都只係精神病發作嘅藉口。
荷李活名導馬田史高西斯認為史上最恐怖嘅恐怖片《閃靈》(The Shining)，嚟緊續集《安眠醫生》(Doctor Sleep)即將上畫，今次就重温下《閃靈》五件趣事。
1.入圍金酸莓獎兩大獎項
網上圖片
每年搶先奧斯卡舉辦嘅金酸莓獎，喺1981年舉行嘅第二屆，當年就提名左《閃靈》嘅導演史丹利寇比力克同埋女主角莎利廸芳 (Shelley Duvall)，最後好彩有拎到獎。當然到左今日，《閃靈》變左經典電影。
2.最恐怖唔係套戲，而係導演寇比力克
網上圖片
全球各地影迷都好鍾意電影大師史丹利寇比力克，好多大導演都視佢為偶像，例如基斯杜化路蘭就公開講明最崇拜利寇比力克。大師最出名就係佢嘅完美主義，例如《閃靈》女主角莎利廸芳就畀佢到精神崩潰。大師為左要逼癲莎利，勒令所有工作人員唔畀同佢傾偈，當佢透明。搞到莎利身心都有健康問題，寇比力克仲同工作人員講話唔洗同情佢。
莎利廸芳喺拍攝嗰陣一日要喊足十二個鐘，就咁拎住捧球棍嘅一場戲就NG左127次。最慘嘅係原本預計四個月就拍完《閃靈》，點知最後拍左差唔多一年先完。
3.史提芬京唔鍾意電影版
網上圖片
恐怖小說大師史提芬京表明好唔鍾意寇比力克嘅改編版本，之後喺1997年史提芬京親自做埋編劇，拍左電視劇《The Shining》，總算一圓心願還原返心目中嘅《閃靈》。
4.「閃靈熱」持續至今
網上圖片
《閃靈》自1980年上畫，歷年聚集唔少狂迷，喺2012年有六個影迷一齊拍左部《Room 237》嘅紀錄片，嘗試解開寇比力克喺《閃靈》入面嘅彩蛋。雖然好多人都覺得呢部紀錄片係捕風捉影，過度推測。不過《閃靈》影迷都一樣睇得咁高興。
