《返校》勇奪金馬五項大獎 五大必睇恐怖情節
香港只有6間戲院肯上畫。有錢唔想賺定係唔敢賺？
台灣校園恐怖片《返校》改編自同名人氣電腦遊戲，由徐漢強執導、王淨、傅孟柏主演。《返校》喺第56屆金馬獎獲得12項提名，頒獎禮喺11月23日舉行，電影勇奪五項大獎，包括：最佳新導演、最佳改編劇本、最佳美術設計、最佳電影原創歌曲、最佳視覺效果。《返校》唔單止揚威金馬，仲創造票房奇蹟，喺台灣總共拎到2.58億台幣票房（約6450萬港紙）。
其實《返校》由上畫開始已經令唔少香港觀眾好期待，原定11月喺香港公映，不過後來又改期喺12月5日上畫，但係唔知點解暫時全香港只有6間戲院肯上畫。《返校》故事講述台灣白色六十年代恐怖時期，政府用盡一切血腥方法打壓人民自由。
網上圖片
點解《返校》會引起咁大迴響呢？今次同大家預習戲中五大可怕情節，可能會得到答案。
1.憲兵打學生
網上圖片
喺《返校》入面，憲兵會喺學校搞洗腦教育，仲會衝入校園捉走學生同老師，之後就會喺監獄虐待毒打佢地，會以酷刑殘虐年輕人，例如：抆指甲、倒吊灌水。憲兵打到後生仔全身重傷，都只係基本動作。
2.鉗制自由
網上圖片
喺電影入面飾演美術老師嘅傅孟柏好鍾意畫畫，佢話過爭取自由係為左學生可以畫到自己想畫嘅嘢。但係喺戒嚴令之下，莫講話畫畫，連諗嘢都冇自由，學生睇嘅書都係經過多重篩選審查。根據真實歷史，戒嚴時嘅台灣，除畫畫之外，連唱歌都會有審查，基本做文藝創作嘅人係冇任何自由。
3.禁止結黨
網上圖片
正常嘅學校環境，學生哥都會三五成群一齊玩，但係《返校》就好少會見到有一個學生以上行埋一齊，最多人就係私自組織嘅「讀書會」。只會喺呢個時候，學生同老師先會開心返少少。而家喺香港就算一個人收工返屋企都好，原來都係非法集會，似乎仲勁過戒嚴。
4.連髮型都要統一
網上圖片
睇戲嗰陣可能會發現個個學生啲髮型都一模，原來當時國民黨實行髮禁，為左方便分到邊啲人係學生，男學生一定要剷青、女學生就要剪冬菇頭，唔可以留長頭髮。統一學生髮型係方便憲兵同差人去捉走學生，二嚟要所有學生都要同樣思想，好似機械人一樣人話乜你就要做乜。
5.全民篤灰
網上圖片
白色恐怖其中一個最得人驚嘅就係全民篤灰，任何人都唔可以相信。喺電影《返校》，戲中政府不繼強調要「舉報匪諜」鼓勵學生篤灰，從中分化人民，要大家互相割席。因為咁樣嘅高壓氣氛當然會搞到人人自危，唔少人為求生存都會走去篤灰，被人篤出嚟就慘，一旦被政府認為你係間諜，無論對國家有咩功勞都會當無發生過，照樣虐待到你不似人形。咁篤灰有咩着數呢？「國家會感謝你。」就係咁多。
