世紀合作？ 咸蛋超人正式加入MARVEL宇宙！
唔知點樣改法？照體型嚟計，似乎得變形俠醫先夠打。
網上圖片
最近舉行嘅Tokyo Comic Con，MARVEL同圓谷宣布推出《Ultraman》美版系列漫畫，作品會喺2020年推出。喺大會入面，雙方代表互笠高帽，發表合作宣言。Marvel責任編輯C.B. Cebulski表示：「咸蛋超人係全球最大嘅改編版權，又有勁多熱情嘅Fans，我地好期待將今次嘅新故事展示畀全世界睇。」佢又話咸蛋超人就好似Marvel 咁，好多唔同世代嘅觀眾都鍾意，而且咁多年嚟一直都有推出電視、電影、玩具、漫畫、仲有好多其他周邊產品。所以Cebulski表示下年就有得發展新嘅咸蛋超人宇宙，覺得相當高興。
當然圓谷製作都相當畀面，CEO塚越隆行就話：「我地好開心可以同Marvel合作，八十年以嚟Marvel出左無數精彩角色同故事，而且一直到受到全球讀者歡迎。冇嘢比起同Marvel 發展同創作新嘅咸蛋超人故事更興奮，可以將全新嘅故事帶畀雙方全球嘅忠實fans係開心嘅。」
網上圖片
Marvel將會喺2020年推出咸蛋超人漫畫，但係就未知係加入Marvel世界定係就咁出美版漫畫。不過咁，其實喺八十年代已經出版過《Ultraman USA》，而且仲改編埋做動畫，就算換鬼佬變身做超人都係水土不服，同美國文化差異太大，最終失敗。
網上圖片
正如Marvel代表所講，咸蛋超人喺全球都有唔少忠實FANS，所以世界各地都會見到咸蛋超人。以前喺香港同加拿大，就有漫畫家再重新畫過新版漫畫，所以港漫都會睇到咸蛋超人，唔係淨係得古惑仔、龍虎門嗰啲。
網上圖片
另外喺80年代嗰陣圓谷老闆去泰國拍戲，飲醉將海外版賣左畀當地公司，結果整左個走樣超人出嚟，至今圓谷都唔承認有呢個泰版超人。
網上圖片
其實Marvel以前都有同日本公司合作過，喺80年代BANDAI想進軍美國，希望可以喺美國賣《鐵甲萬能俠》、《V型電磁俠》呢類日式超合金，但係嗰陣美國冇電視台想播呢幾套動畫。為求打入美國，東映、BANDAI、Mattel玩具、Marvel四大巨頭合作，用美國系列漫畫《Shogun Warriors》去力谷玩具，最後成績都係未如理想。之後BANDAI喺90年代同美國細公司Saban合作推出《新恐龍戰隊》（Power Rangers），結果大受歡迎，不過就唔關Marvel事。
