【末來戰士】票房仆直 導演：唔會再同占士金馬倫合作！
冇票房係邊個責任？
網上圖片
添米勒 (Tim Miller) 執導嘅《未來戰士：黑暗命運》(Terminator: Dark Fate) 揾返兩個原班主演蓮達咸美頓同埋阿諾舒華辛力加重返劇組，由《未來戰士》原創導演占士金馬倫擔任監製，睇落應該係黄金陣容，但係票房只係得2.3億美金。點解會咁呢？
網上圖片
最近導演接受外國媒體訪問嗰陣表示，佢自己都非常失望同埋都有反省點解票房會失敗。不過佢提到自己以後都唔會再同金馬倫合作拍電影。
添米勒喺2016年執導處女作《死侍：不死現身》(Deadpool)，電影事業似乎一片光明。但係佢嘅第二部導演作品《未來戰士》系列續集就票房仆直，佢表示：「我諗我可以出返本書，去分析點解呢部電影會失敗，而家我仲分析緊，仲未可以講得好清楚。但我為呢部電影而自豪。」
好多都認為觀眾已經好厭倦不停remake系列作，導演就認為：「大家最討厭呢部電影嘅原因，亦都係我控制唔到嘅事。我冇可能改變到大家對第四、五集《未來戰士》嘅睇法。」
網上圖片
不過，導演都提到同金馬倫其實唔太啱key，佢話：「雖然金馬倫同大衛艾利遜係監製，佢地有最終話事權。但作為導演，我認為自己係有義務去爭取。」
阿添喺訪問入問表示，佢同金馬倫各自心目中嘅最後版本唔一樣，佢整走左好多金馬倫認為有用嘅戲份，佢地甚至連點講對白都有爭議。佢表示金馬倫希望結局係人類得到勝利，但阿添就覺得人冇可能打得贏天網，只有返到過去先毀滅所有嘢先係惟一致勝之道。但係金馬倫就認為如果人類贏唔到，咁電影仲點會好睇？
阿添覺得好無奈，認為佢以後金馬倫冇可能繼續合作，但佢強調同金馬倫仲係有良好關係，金馬倫仲send E-mail約佢去飲嘢：「我地之間係有啲拗撬，不過大家都係為左拍好電影先會咁講，共係觀點唔同。十二月我會返嚟洛衫磯，到時出嚟飲返杯。」
網上圖片
金馬倫曾經講過，《黑暗未運》只係起點，呢部作品係為之後嘅續路鋪路。不過外媒估計今次電影將會蝕超過一億美金，未來日子可能唔會再睇到《未來戰士》系列。就算有得拍續集，已經冇可能畀添米勒執導，可能要金馬倫重出江湖親自執導先有可能重振聲威。
