《波希米亞狂想曲》監製開拍米高積遜傳奇片 拒絕透露會唔會拍埋巨星醜聞
反而非常好奇有咩演員可以做到米高積遜？始終個樣唔係咁易扮。
因為《波希米亞狂想曲：搖滾傳說》叫好叫座，似乎嚟緊會有唔少樂壇巨星嘅傳記電影。《搖滾傳說》嘅監製格林京（Graham King）表示已經同米高積遜（Michael Jackson）嘅遺產管理人傾掂數，雙方就米高嘅生平同歌曲版權達成協調議，會將佢嘅傳奇改編成電影，同埋已經叫左《帝國驕雄》尊盧根（John Logan）負責劇本，不過格林京就唔肯講呢部電影會唔會講埋米高戀童嘅事件。
網上圖片
外國媒體Deadline報導指，而家仲未有電影公行同發行商參與米高積遜嘅傳記片，但係監製格林京已經揾左《帝國驕雄》同《娛樂大亨》嘅一線編劇尊盧根執筆。報導仲指劇本唔會係「乾淨」版，暗示唔會避開米高懷疑侵犯小朋友嘅事。但係另一網站Variety嘅報導就指格林京確認而家寫緊劇本，但就唔肯回應到底會唔會出埋米高侵犯小朋友嘅部分。
網上圖片
關於米高積遜猥褻小朋友嘅紀錄片《Leaving Neverland》今年年頭喺辛丹斯電影節首映，之後喺HBO有線頻道播出，仲贏埋艾美獎最佳紀錄片。但米高嘅遺產管理人就入稟法院告HBO，指佢地播放米高積遜性侵犯小朋友傳聞嘅紀錄片係違反左雙方嘅不誹謗協議，仲大咬要求1億美金（約7.8億港元）賠償。紀錄片講述兩個現年三十幾歲嘅男人控訴米高積遜當年同佢熟絡之後就性侵犯佢地，當年佢地只係得7歲同10歲。管理米高積遜遺產嘅律師Howard Weitzma表示，HBO違反左1992年播出米高積遜《Dangerous》世界巡迴演唱會嘅合約條款，當時HBO同意唔會喺當時同未來日子誹謗米高。
網上圖片
雖然米高積遜後半生醜聞纏身，但近年就陸續有唔少歌手嘅傳記片上畫，《波希米亞狂想曲：搖滾傳說》舊年上畫全球票房超過9億美金，飾演Queen主音Freddie Mercury嘅雷米馬力（Rami Malek）仲贏埋奧斯卡影帝。另外仲有部關於英國神級歌手艾頓莊（Elton John）嘅傳記片《搖滾太空人》都係喺今年上畫，雖然票房唔夠《波希米亞狂想曲》，但全球都有近2億美金票房。其實喺拍完米高積遜嘅傳記片之前，關於佢嘅傳記音樂劇出年會喺百老匯上演，由《Hamilton》男星Ephraim Sykes 主演。
