又打喪屍仲扮埋鬼 11個版本嘅哥倫比亞火炬女神
火炬、女神。對於香港觀眾嚟講可能別具意義。
網上圖片
最近SONY旗下哥倫比亞影業嘅「火炬女神」（Torch Lady）成為網上熱話，因為SONY喺東京動漫展show左一段火炬女神悠閒打喪屍嘅片段。
網上圖片
喺九十年代， 畫家Michael J. Deas 揾左 Jenny Joseph 為佢做模特兒，原本Michael係想影幅相做油畫創作嘅參考。佢地用一個中午放飯時間影左呢幅火矩女神，佢地都估唔到作品最後會擺喺美國紐奧良美術博物館，同埋哥倫比亞用嚟做開場動畫做左廿幾年。火矩女神基本變左流行文化嘅一部分，而且電影公司會因應返電影內容去做唔同版本嘅火矩女神，火矩女神打喪屍係出自《喪屍樂園：連環屍殺》嘅開場logo。
網上圖片
除左打喪屍之外，歷年哥倫比亞都整過唔同版本嘅火矩女神。
1.《藍精靈》系列
網上圖片
喺《藍精靈2》嘅開場，火矩女神嘅深藍色披肩變左藍精靈淺藍色，離遠仲飛左頂藍精靈帽過嚟。
網上圖片
喺下一集嘅《藍精靈：迷失的村莊》「踢爆」火炬女神原來係個紙板公仔，大家見到原來美芝一直匿埋喺女神後面。
2.《咒怨2》
網上圖片
喺2006嘅荷李活翻拍版嘅《咒怨2》，火炬女神變成猛鬼伽椰子，「COLUMBIA 」字樣都變左戲名「GRUDGE 2」。
3.《黑超特警組：反轉世界》
網上圖片
今上畫嘅《黑超特警組：反轉世界》，見到戴左黑超嘅女神，火炬變左可以消除記憶，兼係「攻擊性武器」嘅鐳射筆，仲放埋閃光。
4.《鬼靈精怪大酒店》
網上圖片
已經出左三集嘅《鬼靈精怪大酒店》系列，片頭嘅火炬女神變左可愛嘅蝙蝠仔飛向銀幕。
5.《青蜂俠》
網上圖片
周杰倫主演嘅《青蜂俠》，雖然片頭都係原版火炬女神，不過成個銀幕都係綠色光對應返電影主題。
6.《銀翼殺手2049》
網上圖片
《銀翼殺手2049》嘅女神背景變左黑白色，女神背光成為剪影，「COLUMBIA」變得有種「後未來」嘅科幻感覺。
7.《蜘蛛俠：跳入蜘蛛宇宙》
網上圖片
話題之作《蜘蛛俠：跳入蜘蛛宇宙》嘅開場，嚟自唔同宇宙時空嘅女神逐一登場。
8.《Emoji大冒險》
網上圖片
喺《Emoji大冒險》開場，有觀眾影低女神再KEY返唔同嘅Emoji上去。記住喺戲院偷拍係犯法架，唔好搞彎晒成個電影工業。
9.《比得兔》
網上圖片
嚟到《比得兔》，火炬女神唔再去紙板公仔，鏡頭跟住幾隻白鴿飛埋去，原來女神變左得立體左。
10.《美食風球》系列
網上圖片
網上圖片
兩集《美食風球》，女神連續兩次畀條蕉打走左，去到第二集條蕉唔單止識行識走，仲有隻蕃茄彈出嚟搶走支火炬。
