DC未來電影計劃 主打大量限制級電影 開拍《閃電俠》《水行俠2》
DC另外兩個重點計劃係remake《綠燈俠》同埋《超人》，呢兩套戲當年票房同口碑都係相當麻麻，尤其《綠燈俠》。
網上圖片
根據美國媒體Vareity報導，DC同華納嚟緊有唔少新搞作，萬眾期待嘅《蝙蝠俠》、《水行俠2》亦都確認左上畫時間，今次一齊睇下之後DC電影有咩計劃。
網上圖片
今次新版《蝙蝠俠》唔會喺阿肯精神病院開始，而且喺今次嘅作品精神病院唔會有太多戲份。官方表示如果新《蝙蝠俠》成功的話，會繼續拍多啲主打反派角色嘅作品。
網上圖片
因為而家R級嘅超級英雄片嘅票房都相當唔錯，例如《joker小丑》全球拎到7.3億美金票房，所以DC有意再拍多啲R級電影。之後嘅《猛禽暴隊：解瘋小丑女》、《自殺特攻：超能暴隊2》都可能會係R級。不過《超能暴隊》世界觀唔似小丑咁黑暗，所以電影公司喺試映之後補拍唔少戲份，改善左唔少缺點，相信都正試上畫嗰陣會有唔錯成績。
網上圖片
華納仲想remake之前拍衰過嘅系列，而家就計劃重拍《綠燈俠》。電影版喺2011曾經上畫，但係評價同票房都極差，似乎華納同DC決定喺邊度跌底就喺邊度企返起身。DC漫畫創意總監Geoff Johns 喺年底交劇本，之後會由《星戰9》導演J.J.艾布斯同佢嘅公司Bad Robot重製《綠燈俠》。但係，DC另一個創作靈魂人物格伯蘭特(Greg Berlanti)就同Geoff Johns拍檔創作劇集版《綠燈俠》，到時電影版可能都係由佢地實際做主導。
網上圖片
另外，華納同時都想再拍《超人》，亦都係同J.J.艾布斯合作。但係華納似乎唔清楚要點樣搞《超人》，呢個角色喺十三年之內重拍過兩次，包括：2006年《超人—強戰回歸》、2013年《超人：鋼鐵英雄》，當年呢兩部電影嘅成績都唔太好。之前華納就有見過米高·B·佐敦，佢主演《王者之後》系列、《黑豹》而成為一線明星，華納希望佢可以做超人，但佐敦就十五十六仲未決定要唔要接呢個角色。知情人士就透露，2023年都唔會睇到《超人》上畫。
網上圖片
當然，DC唔會漏左《水行俠》呢啲咁賺錢嘅作品，華納計劃喺2021年開拍，繼續由温子仁做導演。同時間，華納亦都物色緊導演去拍《水行俠》嘅外傳電影《The Trench》，呢部作品係以《水俠俠》嘅邪惡海底生物配角做為主。
網上圖片
華納仍然想開拍《閃電俠》嘅獨立電影，由艾薩米勒（Ezra Miller）繼續主演，今次就揾左《小丑回魂》系列導演安迪慕式提（Andy Muschietti）執導，《大黃蜂》編劇姬絲汀娜荷辛(Christina Hodson)寫劇本。不過就等米勒拍完下一部《怪獸與牠們的產地》系列電影先可以開拍，即係話最快都要2021年先可以拍到《閃電俠》。
網上圖片
今時今日當然唔會淨係將目標擺喺銀幕，華納旗下嘅串流平台HBO Max都揾緊啱用嘅DC題材，可以喺平台度播。華納希望用低預算去拍平台嘅原創電影，成本盡量喺6500萬美金以下，將會用新人或者唔出名嘅演員做主演。
網上圖片
HBO MAX嘅出現可能會令到薩克薛達（Zack Snyder）嘅導演版《正義聯盟》重新發行，有唔少影迷喺社交網站發起#ReleaseTheSnyderCut 運動，希望華納可以重光導演版。薩克薛達原本執導呢部多重命運世界觀嘅超級英雄團隊作品，當時仲重拍左部鏡頭。不過，喺拍攝途中薩克薛達個女突然自殺，佢冇辦法繼續拍攝，之後換左《復仇者聯盟導演》佐斯維頓（Joss Whedon）接手，後者就加左唔少輕鬆元素喺呢部作品入面。
網上圖片
不過，有知情人士指重新發行導演版《正義聯盟》係發夢，永遠都冇可能發生，因為華納係唔會洗多幾百萬美金去做多次特效同剪接工作。
