【死侍】賴恩雷諾士由選角到劇本全盤控制當導演透明 最後添米勒劈炮唔拍續集
有高層撐腰連導演都可以彈走。
由賴恩雷諾士（Ryan Reynolds）主演嘅超級英雄片《死侍：不死現身》，因為同其他一般嘅英雄片唔同，加上佢嘅搞笑演繹風格大受觀眾好評，當年上畫仲大破R級電影票房紀錄，大收7.82億美金票房，今年就畀DC電影《JOKER小丑》打破紀錄。
網上圖片
導演添米勒（Tim Miller）拍完第一集之後就同雷諾士反面，拍完就即刻劈炮唔做續集嘅導演，最近佢就大踢爆唔做嘅真正原因，其實係同雷諾士有關。
網上圖片
阿添就大爆雷諾士好想控制晒成個《死侍》系列，咁嘅情況之下自己冇可能繼續做個好導演，又指自己唔介意同大家討論創作，但唔係每個決定都要逐一討論，又有好多嘢要仔細諗過度過先得，而且雷諾士的確係代表到成個《死侍》系列。所以導演直接退出，表示「如果佢咁想話事嘅話，咪畀佢話晒事囉。」
網上圖片
其實阿添主要有兩大不滿嘅地方，第一係劇本問題，首先佢心目中已經有晒點拍續集嘅諗法，佢原本係想整個同漫畫一樣，兩米高嘅「機堡」（Cable）、加多啲同死侍女朋友Vanessa嘅故事，本來導演計劃電影同漫畫一樣，將Vanessa變做「Copycat」。仲會加埋《神奇4俠》嘅「石頭人」（The Thing），同「力霸」（Juggernaut）對抗（由雷諾士配音）。
網上圖片
不過當阿添去二十世紀霍士開會嗰陣，佢見到成幅牆已經寫好晒劇本內容，佢嗰陣已經完全知道發生咩事。所以當場即刻表示唔撈，由得佢地任搞。
網上圖片
其次就係選角問題，阿添同雷諾士對於「機堡」嘅人選有嚴重分歧，導演想由《哥斯拉II：王者巨獸》嘅Kyle Chandler做，但雷諾士同霍士高層就想用「魁隆」佐斯布連（Josh Brolin）去做。喺各種問題之下，阿添決定退休，不過佐斯布連演出嘅機堡就人見人愛，深得影迷歡心。
網上圖片
其實阿添除左拍《死侍》同人反面之外，喺拍《未來戰士：黑暗命運》都同占士金馬倫炒大鑊，仲話以後都唔會再同佢合作。
