香港三大鬧鬼戲院
鬼故通常都係伴隨住歷史。
最近豪華戲院執笠，其實香港好多戲院都有鬧鬼傳聞，其中好多間已經拆左，鬼故最後變成傳說，再冇人可以喺同一個遇到同一班鬼。今次就同大家分享一下香港三大鬧鬼戲院。
1. 東城戲院
網上圖片
東城戲院應該係香港史上其中一間最猛鬼嘅戲院，戲院喺1964年落成，喺灣仔洛克道，前身係萬國殯儀館，後來殯儀館搬左去鰂魚涌，之後何東家族接手起左戲院。有唔少老街坊都去過東成都表示喺東成撞過鬼，其中最經典嘅傳聞係當年一位女觀眾去完廁所之後照鏡，發現身邊又有個女人喺度照鏡，佢仔細一望發現原來呢個「女人」係冇樣。女觀眾即刻奪門而去，喺途中見到有個女仔又想去廁所，於是好心提佢廁所有鬼。點知女仔揭起把長頭髮問：「係唔係好似我咁？」原來個「女仔」又係啱啱嗰隻廁所女鬼。
網上圖片
另一個傳說就係戲院長期「全院滿座」，當年東成生意唔太好，但次次都有好多觀眾入場，因為入場人數同戲飛銷售數目長期唔一樣，院方懷疑有好多人冇買飛偷睇戲。於是成日派人入場查戲飛，但點知個個觀眾都有買到真戲飛入場。有部分東成職員就表示，喺開場之前本來得幾個觀眾，點知到臨散場嗰陣再入返去見到成個戲院坐滿左「觀眾」。
網上圖片
因為東成戲院經常鬧鬼，搞到冇人敢幫襯，結果戲院喺1974年拆卸重建，改建做東成大廈。當年東成戲院附近其實有間東方戲院，六十七十年代香港戲院業蓬勃，有人覺得係同行作鬼故打擊生意。但係，東成戲院個廁所前身其實係萬國殯儀館嘅停屍間地窖，所以特別猛鬼。
2.金茂坪戲院
網上圖片
金茂坪戲院位於觀塘秀茂坪，由華懋集團持有戲院業權。戲院喺1978年落成，90年代結業。戲院荒廢至今，一直都冇改建成其他建築，有傳指華懋一直都拆左間戲院，但次次想施工嗰陣都發生意外，所以冇工人肯開工。就算請埋人做法事都唔掂。有傳言指戲院前身係日軍嘅行刑場地，亦都有人話秀茂坪發生過兩次山泥傾瀉，有冤魂作崇。
其實，金茂坪戲院係有小部分地方已經改建做住宅同倉庫，華懋曾經想賣走戲院業權但係賣唔去。據聞，政府唔肯畀華懋改變戲院嘅土地用途，只係可以將戲院部分繼續做返相關用途，有傳華懋會揾唔同嘅機構合作，將戲院變做文藝用途。
3.普慶戲院
網上圖片
普慶戲院原址位於今日嘅彌敦道嘅逸東酒店同普慶廣場，亦都傳過唔少猛鬼傳聞。喺普慶戲院臨執嗰幾年，有班後生仔去嗰度睇戲，其中一個少女喺中途想去廁所。事發時間係下晝五點幾，當時呢間戲院冇鬧鬼傳聞，所以女仔自己好放心咁去廁所。不過因為普慶戲院喺三十年代落成，有返咁上下歷史，廁所都幾殘舊下。但最奇怪嘅地方係得兩廁格，仲要閘晒門。女仔覺得好奇怪，因為得十幾觀眾入場，冇理由廁所會爆棚。咁個女仔惟有等下，但係等極都冇人出嚟，最其怪嘅去個廁係完全冇聲，就連郁動聲都冇。但因為佢實在太急，所以佢彎低腰睇下廁格到底有冇人，結果只係睇一對紅色繡花鞋，整整齊齊擺喺廁格入面，但係就冇人着。
網上圖片
即使喺現代廁格見到一對紅色繡花鞋，都唔會令到呢位少女驚，因為佢實在太急，決定繼續等。點知，呢個時候耳邊忽然傳嚟一把細語聲，一把女聲同佢講：「快啲走。快啲走。」之後仲越講越大聲，語氣越講越惡，嚇到少女衝出廁所，就喺佢臨離開廁所嗰一刻，喺門罅見到對繡花鞋喺個廁格頂度，一個女人嘅上半邊面出現左，冇表情咁望住佢走。
