外媒票選10年內10佳美劇 《權力遊戲》冇上榜
大家睇過邊套？
網上圖片
又差唔多到年尾，外國媒體《Hollywood Report》專登喺近十年嘅劇集，揀十套最佳劇集，2010年一月至2019年十二月播放嘅劇集都係候選劇集。以《廣告狂人》為例，呢部劇集係候選作品，但係頭三季就唔計。
10. 《Better Things》(台譯：更美好的事)
網上圖片
《Better Things》係女主角Pamela Adlon嘅半自傳故事，第一季喺2016年首播。Pamela 喺劇中飾演女演員Sam，一個單親媽媽獨力湊大三個女賺錢，三個女性格各異。劇集冇乜戲劇化情節，每集係二十分鐘嘅輕鬆小故事，展女主角焦慮歲月嘅侵蝕，同埋幾個女嘅成長歷程。劇中唔少情節都係Pamela 嘅自身經歷，所以唔少觀眾都畀呢啲細節打動。至於劇名嚟自英國樂隊The Kinks喺1981年嘅歌《Better Things》，今年已經播完第三季。
9. 《亞特蘭大》(Atlanta)
網上圖片
《亞特蘭大》係一部劇情喜劇（Dramedy），講述學院畢業生Earn為左揾食，做左佢個rapper表弟 Paper Boi 嘅經理人。男主角當奴高化（Donald Glover）本身都係rapper，呢套劇係佢同另一位導演村井浩主導創作，劇集反映左美國南部黑人嘅生活。《亞特蘭大》一時惡搞時下流行文化，一時又會突然又會充滿暴力同悲情，但係又各種唔同嘅元素又可以協調到，唔止係一部普通嘅喜劇。
8. 《守望塵世》(The Leftovers)
網上圖片
《守望塵世》嘅主創人係Damon Lindelof，佢對上一部作品係神劇《迷》(Lost)，呢套劇講述世界有2%人口無故消失，留低嘅人到底會點樣？睇落可能會以為呢部作品係集刺激、懸疑、科幻等元素於一身嘅劇集，但其實《守望塵世》主要係探討留低嘅世上嘅人內心世界嘅變，甚至成部劇集係冇解釋過嗰2%人口點解會唔見左。因為呢個唔係重點。故事嘅重點擺喺事發之後嘅三年，剩低98%嘅人表面上好似一切如常。但係當中有啲人全家消失左；有啲就因為呢件事而改信新興邪教；有啲就變到精神失常等等。劇集嘅重點就要講留低嘅人嘅故事，講述呢班創傷後嘅復元故事。
7. 《電腦狂人》(Halt and Catch Fire)
網上圖片
《電腦狂人》背景發生喺80年代，講述一班虛構嘅天才矽谷精英點樣去改變家用電腦，向觀眾展示人類史上最偉大嘅發明係到底點樣開始、興起、衰落，同埋再次復興。劇集英文原名叫「Halt and Catch Fire」，係嚟自電腦嘅組合語言嘅指令 HCF / HLT，呢個指令會搞到部CPU中止運作，要重新開機先至用得返。
6. 《馬男波傑克》(Bojack Horseman)
網上圖片
Netflix原創動畫《馬男波傑克》原本出第一季嗰陣好多人都唔睇好，不過後來正式上架之後就人人讚好，而家已經係Netflix成績最好嘅動畫作品。喺2018年已經上架第五季，令人失望嘅係Netflix唔會再續訂第六季。《馬男波傑克》講述憑藉一套處境喜劇而紅嘅過氣明星Bojack，佢一直都嘗試重新振作，東山再起。Bojack係一個典形嘅自大乞人憎嘅過氣荷李活演員，平時做好多誇張行為都只係希望身邊嘅人可以接受佢。成部劇集都有唔同形形色色嘅騎呢角色，例如住喺Bojack屋企嘅廢人托德、異常充滿正能量嘅花生醫先生，Bojack經常會同班奇怪人搞出唔少離奇搞笑嘅事。《馬男波傑克》嘅主題似係關於一個過氣嘅演員重重新打拼，攞返原屬於自己嘅嘢，似乎係一個勵志故事。但其實呢套係悲劇，每集當Bojack嘅人生重現多少希望嘅時候，現實又會將佢打沉，即係意味住佢永遠都唔會重新振作到。劇中人物大部分有悲慘嘅過去，例如男主角Bojack 原本細個嘅時候係個積極向上嘅大好青年，但係因為佢阿媽有精神病，而且又認為自己人生畀個仔摧毀左，於是郁啲就拎佢嚟發洩不滿。就係因為咁樣，Bojack 個人格都畀佢阿媽徹底破壞，成個人生冇辦法再振作。
5. 《30 for 30》
網上圖片
《30 for 30》係美國體育媒體ESPN出品嘅頭第七部紀錄片集，呢部作品係紀念ESPN成立三十周年。原本呢套紀錄片集打算喺2009年播放，但係主創人Bill Simmons同Connor Schell想再講得深入啲，所以就用多左十年時間去準備，結果作品喺2010年面世。《30 for 30》講左由1979年起去到2009年，呢三十年間三十個最具代表性運動員嘅故事。包括：傳奇NBA巨星艾佛遜；喺NBA上陣最多場嘅籃球明星A.C.格林，佢最特別之處係直三十二歲，入NBA左第十一年，到要結婚嗰陣先破處，佢嗰集節名叫「鋼鐵處男」(Iron Virgin)；殺妻但又無罪釋放嘅美式足球明O.J. Simson。其實基本上每集都可以當做一部紀錄片電影咁睇，仲要有三十集咁多，做足十年都唔出奇。
4.《 絕命毒師》(Breaking Bad)
網上圖片
《 絕命毒師》第一季係2008年首播，所以頭兩季唔計入十年範圍之內。即使唔計頭兩季都好，第三至第五季嘅超快節奏，同埋令人抖唔到氣嘅驚悚情節相信睇過嘅觀眾永遠唔會忘記到。《 絕命毒師》嘅兩個監製之後都拍左套番外篇《絕命律師》，可能名氣冇咁大，但係都同Breaking Bad差唔多咁精彩。
3. 《廣告狂人》(Mad Men)
網上圖片
《廣告狂人》第一季喺2007播出，六十年代嘅紐約廣告從業員嘅故事為主題，反映戰後美國嘅社會變化。由第四季開始計起嘅《廣告狂人》有唔少集數都相當出色，就算去到最後一季都好，都唔會覺得劇情拖沓，依然吸引到觀眾繼續不停煲落去。
2. 《獄後重生》(Rectify)
網上圖片
《獄後重生》講述一個死刑犯忽然案情逆轉，重獲自由，出獄之後受到成社會白眼，就連屋企對佢嘅態度都唔同左。就算法律還佢清白都好，社會都唔咁易接受，成世人都會畀凶案纏繞住。主角Daniel Holden喺十六歲嗰陣承認殺左女朋友，但之後因為鑑證科技進步，成功證明到佢冇殺人，坐左十八年監終於出返嚟。不過出到自由世界都已經係中年人，所有嘢都唔同晒，可能放監之後只係另一個大啲嘅監獄。男主角 Aden Young嘅演出精彩，完全感染到觀眾情緒，只係沉默冇表情都可以表達到角色內心感情。
1. 《Parks and Recreation》(台譯：公園與遊憩)
網上圖片
《Parks and Recreation》以一個虛構嘅美國城市「Pawnee」為背景，內容環繞住公園管理處辦公室嘅日常小故事，以綜藝節目嘅形式去拍攝，編劇寫劇本嗰陣仲參考埋加州嘅政治運作。呢套作品表面上係一部處境喜劇，但其實係講述辦公室政治，同埋諷刺官僚體制，大快人心。《Parks and Recreation》最犀利之處係冇成套劇冇靚仔靚女演員，就連花巧少少嘅音效同運鏡都冇，單純靠出色嘅對白、劇情、演員表演去吸引觀眾。
