《魔雪奇緣2》製作團隊為求完美 行勻北歐做資料搜集
表面上係資料搜集，其實去旅行。
網上圖片
六年前迪士尼動畫《魔雪奇緣》全球勁收十三億美金票房，今年食住個勢出續集，導演就表示製作續集係為令到個故事更加完整，例如會解釋返點解女王可以用魔法？佢嘅身世又係點樣呢？佢又會去邊度？呢啲問題全部會喺今集一次過解答大家。
網上圖片
《魔雪奇緣2》嘅背景係上集結局嘅三年之後，Elsa成為左女王，喺管治國家嘅時候就不斷聽到遠方神秘聲音嘅呼喚，所以Elsa決定踏上尋根之旅，喺冒險歷程當中自然會伴住危機同挑戰。同一時間佢發現大自然嘅神奇力量，令到自己同大自然connected。導演就表示今次作品唔係一般童話，仲會探討家庭嘅意義、表達追尋自己嘅勇氣、同永不放棄嘅毅力。
網上圖片
為左拍續集，迪士尼嘅工作人員唔單止用左最新嘅動畫技術，仲參考左以前成功嘅往績，例如五十年代嘅迪士尼動畫師為《睡美人》創造左夢境一樣嘅森林同埋魔幻光線，令到《魔雪奇緣》系列班底得到唔少靈感。今次作品為左要做出魔法森林嘅感覺，仲專程喺挪威揾左植物學家做顧問，就為左要做到逼真嘅植被出嚟。
網上圖片
《魔雪奇緣》系列最緊要當然係洗腦主題曲，上集有《Let it go》，今次就有《Into the Unknown》。迪士尼一向都好有誠意，每部電影唔單止會配返當地語言對白，就連電影主題同插曲都會重新填詞，遷就每個地方嘅觀眾。所以香港係有粵語版插曲《Show Yourself》，大家可以先聽下香港版主題曲，然後再聽返英文原版。
