胡歌暌違兩年新作 桂綸鎂曬黑搏盡演出 《南方車站的聚會》有何特別？
似乎同其他中國電影唔太一樣。
電影《南方車站的聚會》係今年康城國際影展惟一入選競賽單嘅華語片，就連荷李活鬼才昆頓塔倫天奴睇完之後都大讚過癮。導演刁亦男喺五年憑《白日焰火》贏左柏林金熊獎，今年再次揚威國際。由桂綸鎂、胡歌主演，氣質女神桂綸鎂為左呢部戲仲專登去曬黑減磅，認真大犧牲。《南方車站的聚會》故事講述一個逃犯畀差人通緝，喺逃亡嘅時候決定將捉自己嘅三十萬懸紅送畀五年冇見嘅老婆。
網上圖片
《南方車站的聚會》延續返導演前作《白日焰火》嘅主題：一個社會邊緣人點樣揾返自己嘅尊嚴。電影嘅英文係《The Wild Goose Lake》，即係野鵝塘，因為故事發生喺武漢野鵝塘湖區，係一個龍蛇混雜、黑幫橫行嘅「城中村」。胡歌飾演嘅周澤農當地電單車劫匪集團嘅頭目，佢班手足同對家火拼，結果搞出人命，所以公安就通緝佢。不過，其實周澤農就冇諗要走佬，只係想畀五年冇見嘅老婆拎到三十萬懸紅，換自己嘅尊嚴同埋證明自己嘅存在。
網上圖片
導演刁亦男寫左呢部電影劇本足足兩年，結構係參考《一千零一夜》，大概係某個波斯皇帝每日都要殺一個少女，女主角為拯救人命自願嫁入皇宮，每日講一個故事畀皇帝聽，因為故事太精彩，每次都會不知不覺就會講到天光，搞到皇帝繼續想聽故仔而唔殺人。《南方》嘅第一場戲就好似《一千零一夜》咁，胡歌飾演嘅逃犯遇到桂綸鎂飾演嘅「陪泳女」，胡歌就同佢講自己嘅故事，之後電影就喺故事同逃避追捕之間插敘。
網上圖片
兩位主角力求演出完，都做唔少準備功夫，正如先前提及桂綸鎂專登曬黑又減磅，而且佢仲提早三個月去左呢個近乎「三不管」嘅鵝塘湖區度住，仲學埋當地方言，同一班街坊變得好熟。而胡歌為左入戲，專登訂造左一件清潔工人制服，仲寫個角色名喺件衫後，佢着住件制服喺村入面周圍走，仲冇人認得佢。甚至有村民走去問佢有冇見到掉左冇耐嘅病歷卡，相當犀利。胡歌為左拍呢部戲，中途冇去過其他揾錢活動，因為佢驚一走左就會入唔返戲。
網上圖片
導演就曾經提到桂綸鎂飾演嘅「陪泳女」，喺現實真係有呢個職業，喺廣西省北海銀灘就有好多陪泳女，專喺沙灘拉客，多數都係嚟自農村或者三線城市嘅女仔。喺《南方》入面提到「小偷大會」，導演強調唔係自己作出嚟，佢話喺2012年嗰陣，中國武漢真係有搞過「全國小偷代表大會」。全中國嘅賊都聚晒喺武漢，佢地包左一間連鎖酒店全層，大家交流經驗、分地頭，仲搞埋偷嘢大賽，最後當然畀人捉晒。
網上圖片
成個劇組基本拍晒成個武漢嘅城中村，成套戲用左2000個臨時演員，全部演員都係專登揀嘅。例如有一場戲要喺廉租樓入面要拍槍戰場面，為左唔好擾民，劇組專登叫晒全部居民去做咖呢啡。而且喺拍匪徒集團嘅時候，導演專程揾左當地古惑仔去飾演。因為如果揾其他人去做，佢地會唔高興，而且佢地演技相當之好。
網上圖片
《南方的車站》嘅創作當然會受限於中國審查制度，但仍然仲可以展現出當代中國基層嘅面貌同狀態，「城中村」嘅生活環境同居民狀態都如實呈現出嚟，基本係同而家中國主流電影相當唔同，明顯係同《流浪地球》、《紅海行動》係完全兩種形態嘅電影。
（註：「城中村」係中國特有嘅貧民窟，座落喺城市入面嘅傳統村落，居住環境惡劣。）
網上圖片
