2019年迪士尼全球票房逼近千億 另外仲有三大荷里活蝕本貨
迪士尼連《星戰》都未上就收成九百幾億票房。(中國電影票房截至12月6日成功突破600億人民幣。)
網上圖片
又嚟到年尾，各大荷里活大片商都會檢視自己業績，相信迪士尼係全球最大贏家，旗下出品嘅《復仇者聯盟4：終局之戰》、《獅子王》、《阿拉丁》等等都破晒票房紀錄。早前外媒《Hollywood Reporter》報導自從迪士尼買起21世紀霍士之後，佢嘅全球票房總共有119.4億美金（約931.3億港幣）。最重要嘅係，《星球大戰：天行者崛起》仲未正式上畫，好難想上畫之後仲可以增長幾多票房。如果唔計霍士旗下嘅電影，迪士尼喺2016年自家出品嘅票房就有76億美金（約592.8億港幣）。
網上圖片
不過，有人歡喜有人愁，有人賺就自然有人蝕。2019年令到荷里活電影公司蝕到開巷嘅作品包括：《雙子任務：疊影危機》、《未來戰士：黑暗命運》、《變種特攻：黑鳳凰》。
網上圖片
就算有大明星坐陣都唔代表會有票房保證，《未來戰士：黑暗命運》有阿諾舒華辛力加、蓮達咸美頓重返做主角，元祖主創占士金馬倫做埋監製，但係觀眾都唔太收貨。
網上圖片
韋史密夫喺暑假嗰陣主演《阿拉丁》，係佢從影生涯最高票房嘅作品。不過到佢主演李安執導嘅《雙子任務：疊影危機》，預算係1.38億美金，但係全球票房得嗰1.72億美金，電影公司基本上係蝕到入肉。因為票房係會同發行商、院線分成，通常去到最後電影公司其實係賺唔到太多票房收益。
網上圖片
《雙子任務：疊影危機》其實早喺1997年已經寫好劇本，喺當年嚟講可能都算有新意，但到李安接手嗰陣已經相隔多年，故事情節已經變得老土。就算李安用盡全力，用最高規格嘅技術去拍呢部戲，但好難幫劇本擺脫九十年代嘅氣息（重點係其一個編劇係《權力遊戲》嘅 David Benioff ）。電影用埋一秒120格、4K、3D技術都係失敗，因為全球可以放映嘅戲院都唔多。順帶一提，當時可以放映全規格《雙子任務》嘅戲院，只有位於中國東莞嘅Cinity院線。換句話講，世上其實都冇幾多人可以成功睇到Full format嘅《雙子任務》。
網上圖片
另外，經過多次延期上畫、重拍嘅《變種特攻：黑鳳凰》，用左2億美金預算，全球票房只有2.5億美金，算係呢系列入面成績最差嘅作品。迪士尼買起霍士之後，外界預計《變種特攻》系列會換成全新主演組合、由原著Marvel繼續主理電影版。
