《E.T.》37年後再拍續集？ 廣告短片重現經典連港產片都有致敬
謝霆鋒（哭）：「阿爹！阿爹！」 <<=== 估下呢句對出自邊部港產片？
喺1982年上畫嘅經典電影《E.T.》有幾經典？電影嘅E.T.成為外星人嘅稱呼，可想而知幾咁經典。呢部電影由史提芬史匹堡執導，當年全球票房高達八億美金（約64億元港紙），事隔三十七年，有串流平台以《E.T.》做主題推出廣告版續集，再次掀起風潮。
網上圖片
《E.T.》故事講述十歲嘅男仔埃利奧特（Elliott）意外發現外星人E.T.，仲用糖引左E.T.去佢屋企，為左唔畀人發現E.T.，埃利奧特三兄妹就收埋E.T.喺屋企。E.T.之後自己研究到同飛船通訊嘅裝置，後來因為佢身體適應唔到地球而變得越嚟越差，埃利奧特決定送佢返鄉下。喺萬聖節嗰日，佢地踩住單車，送走E.T.。
網上圖片
隔左咁多年，《E.T.》終於有「續集」，喺網上點擊率已經超過1000萬。片長大約四分鐘，當年得十一歲嘅童星亨利 湯馬士而家已經四十八歲，佢喺廣告入面嘅劇情已經結左婚生埋仔女。喺聖誕節前夕，埃利奧特見到E.T.匿喺雪人後面，之後就係老友重遇嘅感人場面。最後，埃利奧特一家人向E.T.展示地球科技，仲一齊食飯。
網上圖片
呢條短片當然係有唔少地方連結返原版電影，例如入問口之後，E.T.就令到凋謝嘅盆栽返生，呼應返電影入面可以令植物再生嘅設定。另外，E.T.想返屋企嗰陣，兩個小朋友就踩單車飛到半空，同原版嘅經典場面好似。喺廣告嘅尾聲，埃利奧特一家人都目送E.T.離開，臨走前佢點左下埃利奧特嘅心口，話「我就喺呢度」，為續集完美收官。
網上圖片
其實港產片都有致敬呢部經典作品，喺1999年由劉偉強執導，改編同名漫畫作品《中華英雄》，當年戲院公映版有一幕經典情節，情節大約講由鄭伊健飾演嘅華英雄，因為自己係天煞孤星費時累到由謝霆鋒飾演嘅囝囝華劍雄。兩個喺明月之下，深情對話左一輪，華英雄喺呢個時候忍唔住同寶貝仔講話：「大個仔喇。」跟住就突然嗖一聲飛過月亮，當時成個戲院笑聲雷動，伴隨住謝霆鋒大叫阿爹嘅哭腔，似有啲違和。
網上圖片
事關當年華英雄橫飛朗月嘅鏡頭，係《E.T.》嘅經典鏡頭一模一樣，所以令到觀眾咁歡樂，當年吳君如喺電台開咪仲笑到收唔到聲。可能片方覺得效果出乎意料，所以開畫三日即刻CUT左呢個鏡頭，只有當年嘅戲院盜錄版先會欣賞到呢幕另類經典，不過而家已經揾唔返呢一幕嚟睇，相當可惜。
