王家衛監製《出貓特攻隊》導演最新作品
唔係王家衛做導演應該好快拍得完。
AP圖片
王家衛最近又有新搞作，佢旗下嘅澤東電影將製作泰國電影，導演係納塔屈彭皮里亞（Nattawut (Baz) Poonpiriya）、女主角茱蒂蒙翠莎容素欣（ Chutimon (Aokbab) Chuengcharoensukying），今次兩個人係繼《出貓特攻隊》之後再度合作。王家衛負責監製呢部電影，片名叫《One for the Road》，亦都係納塔屈彭皮里亞嘅最新執導作品。
網上圖片
《One for the Road》 一個星期之前已經喺紐約開機，遲啲亦會喺泰國取景。今次嘅作品其中一個重點就係導演彭皮里亞又再同《出貓特攻隊》嘅女主角莎容素欣合作。《One for the Road》故事講述有兩個好朋友，其中一個確診患有末期癌症，之後佢地展開公路旅程。
網上圖片
今次嘅新作由澤東電影出品，王家衛監製，由佢旗下嘅BLOCK 2 Distribution（BLK2）負責國際發行。王家衛近呢幾年都籌備緊佢嘅新作《繁花》，係改編上海作家金宇澄嘅同名小說，同時亦被視係《花樣年華》第三部曲（但唔再係由梁朝偉做主角）。佢對上一部導演作品《一代宗師》，已經係2013年嘅事。喺2018年，佢監製左西藏電影《撞死一隻羊》，由西藏導演萬瑪才旦（པད་མ་ཚེ་བརྟན）執導。同年，佢仲監製埋一部評價極差嘅《歐洲攻略》，由梁朝偉主演。嚟緊偉仔就主演MCU作品《上氣：十環幫傳奇》（暫譯）（ Shang-Chi and the Legend of the Ten Rings），佢到時會飾演反派傳滿州。
網上圖片
王家衛喺佢嘅聲表示，佢好高興可以有機會同啲有才華嘅人合作，就好似導演彭皮里亞咁，佢喺《出貓特攻隊》已經證明左佢有好強嘅講故事嘅能力。
網上圖片
《出貓特攻隊》令到彭皮里亞成為亞洲一線導演，呢部電影喺2017年係泰國本土票房冠軍，電影風潮席捲全亞洲，例如喺香港突破二千萬票房，係史上最高票房嘅泰國電影，所以呢部電影絕對喺國際市場最成功嘅泰國電影。
網上圖片
導演彭皮里亞就話：「作為一個電影人，我諗一定要不停咁鞭策自己，令到自己做得更好，盡量唔好畀自己停留喺舒適圈。已經同電影大師王家衛先生做左一年嘢，呢個係千載難逢嘅機會，可以帶我遠領舒適圈，同埋可開發作為導演嘅新領域。最重要都係可以做返自己。」
《One fot the Road》目前仲未有上畫時間。
